17.02.2026 | 23:22
ՀՀ ԱԳ նախարարի տեղակալը Հռոմում ներկայացրել է COP17-ի Հայաստանի նախագահության առաջնահերթությունները
Ռուսական զորքերը հարվածել են Զապորոժիեում հանգստի բազային․զոհվել է երկու մարդ, վիրավորվել՝12-ը
Քաղաքականություն
06.08.2025 | 12:17
Ռուսական զորքերը օգոստոսի 6-ի առավոտյան հարվածել են Զապորոժիեի շրջանին, գրում է Current time-ը։
Զապորոժիեի շրջանային ռազմական վարչակազմի ղեկավար Իվան Ֆյոդորովի խոսքով՝ զոհվել է երկու մարդ։ Ուկրաինայի արտակարգ իրավիճակների պետական ծառայությունը հայտնել է, որ վիրավորվել է 12 մարդ, այդ թվում՝ երկու երեխա։ Գերատեսչության տվյալներով՝ ռուսական զորքերն ավիառումբերով հարվածել են Զապորոժիեի շրջանի բնակավայրերից մեկի հանգստի բազայի տարածքին։
Վնասվել է առնվազն ինը շենք։ Արտակարգ իրավիճակների ծառայություններն աշխատում են դեպքի վայրում։
Ուկրաինայի զինված ուժերի տվյալներով՝ օգոստոսի 5-ի երեկոյից ի վեր Ռուսաստանի զինված ուժերն Ուկրաինայի վրա արձակել են 45 անօդաչու թռչող սարք, այդ թվում՝ «Շահեդ» և անօդաչու թռչող սարքերի իմիտատորներ։ Ուկրաինական զինված ուժերը երկրի հյուսիսում, հարավում և արևելքում խոցել են 36 անօդաչու թռչող սարք։
«Այս հարվածում ռազմական իմաստ չկա։ Միայն դաժանություն՝ վախեցնելու համար»,- հարվածը մեկնաբանել է Ուկրաինայի նախագահ Վլադիմիր Զելենսկին։
Նա նաև հայտնել է, որ օգոստոսի լույս 6-ի գիշերը ռուսական բանակը հարվածել է Դնեպրոպետրովսկի մարզի էլեկտրացանցերին, հարձակվել է Օդեսայի մարզի Նովոսիլսկոյե քաղաքում գտնվող գազային կայանի վրա՝ հարյուրավոր մարդկանց թողնելով առանց գազի, ինչպես նաև Խերսոնի, Խարկովի և Դոնեցկի մարզերի քաղաքացիական անձանց և տների վրա։
«Անկախ նրանից, թե ինչ է ասում Կրեմլը, նրանք անկեղծորեն կձգտեն պատերազմը դադարեցնել միայն համապատասխան ճնշում զգալուց հետո»,- հավելել է Զելենսկին՝ կոչ անելով ԱՄՆ-ին և Եվրոպային ուժեղացնել ճնշումը Ռուսաստանի վրա։
Թարգմանությունը՝ Էմմա Չոբանյանի
