05.12.2025 | 13:08
ՄԹ պաշտպանության հարցերով պետնախարարի գլխավորած պատվիրակությունն այցելել է Հայոց ցեղասպանության հուշահամալիր
Թրամփն առանձին հանդիպումներ կանցկացնի Փաշինյանի և Ալիևի հետ․ հայտնի է հանդիպումների ժամանակացույցը
Քաղաքականություն
06.08.2025 | 10:45
ԱՄՆ նախագահ Դոնալդ Թրամփն օգոստոսի 8-ին երկկողմ առանձին հանդիպումներ կունենա ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ։ Այս մասին հայտնում են ադրբեջանական լրատվամիջոցները՝ վկայակոչելով Bloomberg-ի լրագրող Ջասթին Սինկին ուղարկված ԱՄՆ նախագահի հանդիպումների օրակարգը։
Ըստ դրա օրակարգի՝ օգսոստոսի 8-ին Վաշինգտոնի ժամանակով 14։30-ին նախագահ Թրամփը երկկողմ հանդիպում կունենա ՀՀ վարչապետի հետ։ Ժամը 15։20-ին Թրամփը կընդունի Ադրբեջանի նախագահին, իսկ ժամը 16։00-ին նա համատեղ հայտարարություն կանի ՀՀ վարչապետի և Ադրբեջանի նախագահի հետ։
Հիշեցնենք՝ Վաշինգտոնում բնակվող ադրբեջանական «Թուրան» գործակալության նախկին թղթակից Ալեքս Ռաուֆօղլուն հայտնել էր, որ ԱՄՆ նախագահ Դոնալդ Թրամփը պատրաստվում է ուրբաթ Սպիտակ տանն ընդունել ՀՀ վարչապետ Նիկոլ Փաշինյանին ու Ադրբեջանի նախագահ Իլհամ Ալիևին։ Այնուհետև նա այլ մանրամասներ էր ներկայացրել։
«Այս ուրբաթ կայանալիք ԱՄՆ-Հայաստան-Ադրբեջան գագաթնաժողովի մասին որոշ մանրամասներ՝ ըստ իմ աղբյուրների։ Թրամփն առաջինը կհանդիպի Հայաստանի վարչապետ Փաշինյանի հետ, հետո կընդունի Ադրբեջանի նախագահ Ալիևին։ Այնուհետև երեք առաջնորդները համատեղ հայտարարություն կանեն»,- գրել է լրագրողը X-ի միկրոբլոգում։
Այսօր արդեն Երևանը պաշտոնապես հաստատեց Նիկոլ Փաշինյանի ԱՄՆ այցի և հանդիպումների մասին օրեր շարունակ շրջանառվող լուրերը։
Թարգմանությունը՝ Էմմա Չոբանյանի
