08.08.2026 | 15:38
Ողջույն Հայաստան. NVIDIA-ի հիմնադիր Ջենսեն Հուանգը շնորհավորել է Firebird-ի ԱԲ գործարանի բացման առիթով
Վարչապետի ընտրության նպատակով ԱԺ հատուկ նիստի օրը հայտնի է
Քաղաքականություն
19.10.2018 | 11:53
Ազգային ժողովի հատուկ նիստը, որի ժամանակ, ըստ Սահմանադրության, պետք է տեղի ունենա վարչապետի ընտրություն, կկայանա հոկտեմբերի 24-ին։ Տեղեկությունը Factor.am-ին փոխանցեց ԱԺ հանրային կապերի պատասխանատու Կնյազ Սարոյանը և հավելեց․ «Սահմանադրությամբ, այո՛, նախատեսվում է, որ վարչապետի ընտրության համար ԱԺ արտահերթ նիստը պետք է տեղի ունենա հոկտեմբերի 24-ին, սակայն, մենք դեռ այդ մասին պաշտոնական հայտարարություն չենք արել, այն կլինի ավելի ուշ»։
Հիշեցնենք, որ ըստ Սահմանադրության, վարչապետի հրաժարական ներկայացնելու կամ վարչապետի պաշտոնը թափուր մնալու այլ դեպքերում կառավարության հրաժարականն ընդունվելուց հետո` յոթնօրյա ժամկետում, Ազգային ժողովի խմբակցություններն իրավունք ունեն առաջադրելու վարչապետի թեկնածուներ: Ազգային ժողովը վարչապետին ընտրում է պատգամավորների ընդհանուր թվի ձայների մեծամասնությամբ, իսկ վարչապետ չընտրվելու դեպքում քվեարկությունից յոթ օր հետո անցկացվում է վարչապետի նոր ընտրություն, որին մասնակցելու իրավունք ունեն պատգամավորների ընդհանուր թվի առնվազն մեկ երրորդի առաջադրած վարչապետի թեկնածուները:
Եթե պատգամավորների ընդհանուր թվի ձայների մեծամասնությամբ վարչապետ չի ընտրվում, ապա Ազգային ժողովն արձակվում է իրավունքի ուժով:
Ազգային ժողովի արտահերթ ընտրությունն անցկացվում է Ազգային ժողովի արձակվելուց ոչ շուտ, քան երեսուն, և ոչ ուշ, քան քառասունհինգ օր հետո։
