Լիբանանի նախագահը «Հըզբոլլահ»-ին կոչ է արել հանձնել զենքերը

Լիբանանի նախագահ Ջոզեֆ Աունը շիաների «Հըզբոլլահ» շարժմանն ու մյուս քաղաքական կուսակցություններին կոչ է արել զենքերը հանձնել կառավարական բանակին․ քայլ, որին հզոր զինյալ խմբավորումը դիմադրում է, մինչդեռ Վաշինգտոնն ուժեղացնում է ճնշումները, գրում է Reuters-ը:

«Բոլոր քաղաքական կուսակցությունների պարտականությունն է՝ առանց վարանելու օգտվել այս պատմական հնարավորությունից և ապահովել, որ զենքը պատկանի բացառապես բանակին և անվտանգության ուժերին, և ոչ մեկ ուրիշին»,- հայտարարել է Աունը։

«Հըզբոլլահ»-ը, որն անցյալ տարի Իսրայելի հետ պատերազմից լուրջ վնասներ է կրել, հայտարարել է, որ Իրանի հետ կապված խմբավորման զինաթափման կոչերը միայն Իսրայելին են ծառայում։

«Նրանք, ովքեր կոչ են անում զենքը հանձնել, գործնականում պահանջում են այն հանձնել Իսրայելին… Մենք չենք ենթարկվի Իսրայելին»,-  հայտարարել է խմբավորման ղեկավար շեյխ Նաիմ Քասեմը։

ԱՄՆ-ը ճնշում է գործադրում Լիբանանի վրա՝ պաշտոնական որոշում կայացնելու «Հըզբոլլահ»-ին զինաթափելու հարցում, նախքան երկրում Իսրայելի ռազմական գործողությունների դադարեցման վերաբերյալ բանակցությունների վերսկսումը։ Այս մասին Reuters-ին հայտնել են հարցին ծանոթ հինգ աղբյուրներ։

Աունը նշել է, որ Վաշինգտոնին ուղղված առաջարկը, որը հաջորդ շաբաթ կներկայացվի կառավարությանը, պահանջում է, որ Իսրայելը դադարեցնի Լիբանանի վրա հարձակումները և նահանջի իր հարավային դիրքերից, իսկ «Հըզբոլլահ»-ն իր զենքը հանձնի լիբանանյան բանակին։

Առաջարկը նպատակ ունի ապահովել տարեկան 1 միլիարդ դոլար 10 տարվա ընթացքում՝ բանակին և անվտանգության ուժերին աջակցելու համար, և ներառում է միջազգային համաժողովի ծրագրեր, որը տեղի կունենա տարվա վերջում՝ Լիբանանում վերակառուցման ջանքերին աջակցելու համար։

Թարգմանությունը՝ Էմմա Չոբանյանի