29.04.2026 | 16:51
Ուզո՞ւմ եք նույն ոճով պատասխանեմ Ձեզ, ոնց Դուք եք վիրավորում. դատախազը` Գեղամ Մանուկյանին․ ՏԵՍԱՆՅՈՒԹ
Մոլդովայի նախագահը ՌԴ-ին մեղադրել է առաջիկա խորհրդարանական ընտրություններին «աննախադեպ» միջամտություն նախապատրաստելու մեջ
Քաղաքականություն
30.07.2025 | 17:43
Մոլդովայի նախագահ Մայա Սանդուն Ռուսաստանին մեղադրել է 2025 թվականի սեպտեմբերի 28-ին կայանալիք խորհրդարանական ընտրություններին «աննախադեպ» միջամտություն նախապատրաստելու մեջ, գրում է Current time-ը։
Պաշտոնյայի խոսքով՝ Ռուսաստանը ձգտում է ընտրությունների արդյունքում «վերահսկողություն» հաստատել Մոլդովայի նկատմամբ։
Ըստ Սանդուի՝ Մոլդովայի խորհրդարանում մեծամասնություն ստանալու համար Ռուսաստանի իշխանությունները կօգտագործեն մի քանի քաղաքական նախագծեր և գործիքներ։ Մասնավորապես, Ռուսաստանի Դաշնությունը մտադիր է օգտագործել չափավոր եվրոպամետ ընտրազանգվածին և անկախ թեկնածուներին, տեղեկատվական արշավներ, ձայների գնում, ագրեսիվ բողոքի ցույցեր և պետական հաստատություններում վանդալիզմի ակտեր, որոնք, ի թիվս այլ բաների, ֆինանսավորվում են փախստական օլիգարխ Իլան Շորի կողմից։
Բացի այդ, նրա խոսքով, նպատակներից մեկը կլինի արտասահմանում ընտրողների մասնակցության նվազեցումը սադրանքների և ընտրական կոռուպցիայի միջոցով: Մոլդովան մտադիր է արտասահմանում բացել ռեկորդային թվով ընտրատեղամասեր՝ գրեթե 300: Նախատեսվում է նաև կազմակերպել չճանաչված Մերձդնեստրի և Գագաուզիայի ընտրողների մոբիլիզացիան և նրանց տեղափոխումը ընտրատեղամասեր: Մոլդովայի նախագահը նշել է, որ ընտրություններից առաջ Մերձդնեստրում կարող է առաջանալ «էներգետիկ ճգնաժամ»: Այն կարող է կազմակերպել Ռուսաստանը, որն այնտեղ գազ է մատակարարում:
Ռուսաստանի իշխանությունները Մոլդովայում քաղաքական նախագծերը ֆինանսավորելու համար օգտագործում են անօրինական սխեմաներ, ասել է Մայա Սանդուն, և մտադիր են միայն կրիպտոարժույթից փոխանցել մոտ 100 միլիոն եվրո։
«Ընտրությունները պետք է լինեն ազատ և արդար։ Մոլդովան պետք է որոշում կայացնի Մոլդովայի համար»,- հայտարարել է նա։
Լրատվամիջոցը նշում է, որ Մոլդովայում կայանալիք խորհրդարանական ընտրություններից առաջ Ռուսաստանն ավելի ակտիվ է դարձել։ 2025 թվականի ապրիլից ի վեր ռուսական կառավարամետ «Մատրյոշկա» բոտերի ցանցն ու Եվգենի Պրիգոժինի կողմից ստեղծված «Բռնաճնշումների դեմ պայքարի հիմնադրամը» Մայա Սանդուի դեմ լայնածավալ ապատեղեկատվական արշավ են կազմակերպել։
Հուլիսի 14-ին ՌԴ Արտաքին հետախուզության ծառայությունը քննադատել էր Մոլդովայի իշխանություններին, իսկ հուլիսի 25-ին ՌԴ նախագահ Վլադիմիր Պուտինը թույլատրել էր Մոլդովայի քաղաքացիներին մեկ տարի աշխատել Ռուսաստանում առանց արտոնագրերի։
Թարգմանությունը՝ Էմմա Չոբանյանի
