Կրեմլը չի բացառել Չինաստանում Պուտին-Թրամփ հանդիպման հնարավորությունը

Ռուսաստանի և ԱՄՆ նախագահների հանդիպումը կարող է տեղի ունենալ միայն փորձագիտական մակարդակով դրա նախապատրաստումից հետո։ Այս մասին ճեպազրույցի ժամանակ հայտարարել է ՌԴ նախագահի մամուլի քարտուղար Դմիտրի Պեսկովը, գրում է Ինտերֆաքսը։

«Մենք կարծում ենք, որ նախ պետք է որոշակի աշխատանք կատարել փորձագիտական մակարդակով, քանի որ այդ դժվար, սև աշխատանքը նախագահներին թողնելը բացարձակապես անտրամաբանական է: Նախ պետք է նախապատրաստվել, մշակել կարգավորման պարամետրերը, ապա դրանք ամրագրել ամենաբարձր մակարդակով, այլ ոչ թե հակառակը։ Հանդիպման համար առարկայական նախապատրաստություններ չեն տարվում, քանի որ համաձայնեցված շփումներ չկան»,- ասել է նա՝ մեկնաբանելով Թուրքիայի նախագահ Ռեջեփ Թայիփ Էրդողանի հայտարարությունը Ստամբուլում Վլադիմիր Պուտինի և Դոնալդ Թրամփի միջև հանդիպում կազմակերպելու պատրաստակամության մասին։

Կրեմլի ներկայացուցչին նաև խնդրել են  մեկնաբանել Թուրքիայի ԱԳ նախարար Հաքան Ֆիդանի խոսքերը, որ Մոսկվան և Կիևը սկզբունքային համաձայնության են եկել, որ Ռուսաստանի և Ուկրաինայի նախագահների միջև ապագայում հնարավոր հանդիպումը կարող է տեղի ունենալ Թուրքիայում։

«Թուրքիան, անկասկած, դուր է գալիս բանակցությունների բոլոր կողմերին, իհարկե, ես խոսում եմ մեր կողմից, մենք շնորհակալ ենք Անկարային և թուրքական ղեկավարությանը իրավիճակի կարգավորման ուղիներ գտնելուն նպաստելու ջանքերի, այն պայմանների համար, որոնք թուրքական ղեկավարությունն ապահովում է բանակցությունների համար, և, իհարկե, մեր այս տրամադրվածությունը մնում է հեռանկարի համար»,- պատասխանել է  Պեսկովը։

Նա հիշեցրել է, որ Պուտինը պատրաստվում է այցելել Չինաստան։

«Եթե այնպես ստացվի, որ ԱՄՆ նախագահը որոշի նույն ամսաթվերին այցելել Չինաստան, ապա, իհարկե, նման հանդիպումը տեսականորեն չի կարելի բացառել, եթե պետությունների ղեկավարները հայտնվեն նույն քաղաքում»,- ասել է Կրեմլի խոսնակը։

Նա կրկնել է՝ «դեռևս չկան որևէ կոնկրետ մշակումներ կամ գործողություններ դրան նախապատրաստվելու համար»։

Հավելենք, որ Թուրքիայի նախագահ Ռեջեփ Թայիփ Էրդողանը հայտարարել էր Ռուսաստանի և ԱՄՆ նախագահներ Վլադիմիր Պուտինի ու Դոնալդ Թրամփի հետ հեռախոսազրույցներ ունենալու ծրագրերի մասին՝ Ստամբուլում նրանց հնարավոր հանդիպման կազմակերպման հարցով։

Թարգմանությունը՝ Էմմա Չոբանյանի