05.11.2026 | 23:32
Հայաստան-Լիտվա համագործակցություն․ Վահան Կոստանյանը աշխատանքային այցով մեկնել է Վիլնյուս
Թուրքական Բուրսայում երրորդ օրն է՝ անտառային հրդեհներ են մոլեգնում․ ավելի քան 3500 մարդ է տարհանվել․ ՏԵՍԱՆՅՈՒԹ
Քաղաքականություն
28.07.2025 | 14:48
Թուրքիայում շարունակում են մոլեգնել անտառային հրդեհները։ Դրանք սպառնում են երկրի չորրորդ խոշորագույն քաղաքին՝ Բուրսային՝ ստիպելով ավելի քան 3500 մարդու լքել իրենց տները։ Բուրսայում անտառային հրդեհները մոլեգնում են արդեն երրորդ օրը։
TRT Haber-ի հաղորդմամբ՝ քաղաքի Օրհանելի շրջանի Յաքուփլար թաղամասի անտառածածկ տարածքում երեկ բռնկված և Հարմանջըքի ուղղությամբ շարժվող հրդեհը մարվում է անտառտնտեսության տարածաշրջանային վարչության և հրշեջների կողմից։ Բուրսայի երկինքը ծածկվել է խիտ ծխով։
Հուլիսի 26-ին Բուրսայի Օրհանելի և Հարմանջըք շրջանների միջև բռնկված և քամու ազդեցության հետևանքով տարածվող հրդեհի պատճառով, որպես նախազգուշական միջոց, տարհանվել են Հարմանջըք շրջանի Դութլուջա, Իլիչակսու, Չամօղլու, Չաթալսյողյութ և Չաքմաք գյուղական թաղամասերը, Օրհանելի շրջանի Յաքուփլար թաղամասը և Բյույուքորհանի Գեդիկլեր թաղամասը, հրդեհի հետ կապված մեկ կասկածյալ ձերբակալվել է։
Բուրսայի նահանգապետարանի հայտարարության համաձայն՝ Գլխավոր դատախազությունը հետաքննություն է սկսել քաղաքում անտառային հրդեհների մասին հաղորդագրությունների հիման վրա։
«Հետաքննության շրջանակում ձերբակալվել է մի անձ, որը նախկինում ենթարկվել էր քրեական հետապնդման FETÖ-ի (կրոնական գործիչ Ֆեթուլլահ Գյուլենի շարժում) հետ կապերի պատճառով»,- ասվում է հայտարարության մեջ։
Հայտնի է դարձել, որ ձերբակալված Ու.Ա.-ն 2021 թվականին ազատվել է կրտսեր սպայի պաշտոնից, իսկ դրանից առաջ նա որոշ ժամանակ աշխատել է բենզալցակայանում։
Հայտարարության մեջ նշվում է, որ քաղաքում բռնկված անտառային հրդեհների դեմ պայքարում են օդից և ցամաքից՝ 11 ինքնաթիռով, 971 ցամաքային տրանսպորտային միջոցով և 2684 անձնակազմով։
Թուրքական լրատվամիջոցների հաղորդմամբ՝ նախօրեին երեք մարդ է զոհվել Բուրսայում անտառային հրդեհների գոտի տանող ջրցան մեքենայի վթարի հետևանքով։ Մասնավոր ընկերությանը պատկանող ջրցան մեքենան շրջվել է Դուդաքլը թաղամասի մոտակայքում՝ հրշեջ խմբերին ջուր հասցնելիս։ Վարորդը տեղում մահացել է։ Մեքենայում գտնվող ևս երկու մարդ ծանր վնասվածքներ է ստացել և ավելի ուշ մահացել հիվանդանոցում։
Անտառտնտեսության նախարար Իբրահիմ Յումաքլին կիրակի ուշ երեկոյան լրագրողներին հայտնել է, որ Բուրսայից հյուսիս-արևելք գտնվող գյուղերից անվտանգ տարհանվել է 3515 մարդ, ավելի քան 1900 հրշեջ շարունակում է պայքարել կրակի դեմ:
Հավելենք, որ Թուրքիայում այլ շրջաններում նույնպես անտառային հրդեհների դեմ պայքարը շարունակվում է։
Թարգմանությունը՝ Էմմա Չոբանյանի
