13.05.2026 | 16:27
Զյուգանովը պահանջել է, որ դադարեն Նիկոլ Փաշինյանին ընդունել Մոսկվայում
Ինչ են ուտում բանտում․ դատապարտյալներն ահազանգում են, ՔԿՀ-ն՝ հակառակը պնդում․ ՏԵՍԱՆՅՈՒԹ
Հասարակություն
25.07.2025 | 19:45
Վատ որակի սնունդ, հաճարով փլավի փոխարեն՝ խաշած ցորեն, դիաբետիկների համար չանհատականացված ուտեստներ և այլն․ քրեակատարողական հիմնարկներում դիտորդական առաքելություն իրականացնող խմբի անդամները 2025 թվականի ապրիլ-հունիս ամիսների ընթացքում այսպիսի բովանդակության ահազանգեր են ստացել ազատազրկված անձանցից։ Այդ ժամանակահատվածում ընդհանուր 48 ահազանգ է ստացվել, և ոչ միայն սննդի հետ կապված։
Դիտորդական խումբն արձանագրել է, որ առողջական խնդիրներ ունեցող դատապարտյալներին և կալանավորներին մատուցվել է նրանց համար վնասակար սնունդ, որը ստիպված են եղել ուտել։
Տևական ժամանակ Factor TV-ն նույնպես ահազանգեր էր ստանում ՔԿՀ-ներից սննդի վատ որակի հետ կապված։ Դեռևս մայիսի սկզբին այցելեցինք «Արմավիր» ՔԿՀ՝ տեղում ստուգելու սննդի որակը․ ինչպես և սպասելի էր՝ մեր այցի ժամանակ սնունդն ու սանիտարահիգիենիկ պայմանները շատ լավ էին։ Խոհարարն էլ շեշտում էր՝ յուրաքանչյուրի համար ապահովվում է անհրաժեշտ կալորիականությունը։
Արձանագրեցինք, որ սնունդն առանձնացված էր առողջական խնդիրներ ունեցող դատապարտյալների և կալանավորների համար։ Դեռևս երկու ամիս առաջ ՔԿՀ-ում վստահացրել էին՝ անում են հնարավորը, որ մատուցվող սնունդը բարձրորակ լինի։
Factor TV-ի նկարահանման ժամանակ մեզ ուղեկցում էր նաև «Արմավիր» ՔԿՀ պետ Գարիկ Ծատուրյանը, աշխատակիցներ Քրեակատարողական ծառայությունից և հիմնարկից։ Մեր այցի մասին ՔԿՀ-ում նախօրոք տեղյակ էին․ կալանավորներից և դատապարտյալներից մի քանիսն ասում էին, որ հենց այս հանգամանքով է պայմանավորված եղել սննդի և խոհանոցի իդեալական վիճակը։ Շուշան Խնկոյանը նույնպես շեշտում է՝ չհայտարարված այցերի ժամանակ պատկերն այլ է լինում։
Պետբյուջեով նախատեսված ֆինանսական միջոցներով քրեակատարողական հիմնարկներում պահվող անձանց օրական միջին ծախսը մեկ անձի հաշվարկով, ներառյալ՝ բոլոր տեսակի ծախսերը, կազմում է մոտ 13 հազար 119 դրամ: Factor TV-ի հարցմանն ի պատասխան՝ Քրեակատարողական ծառայությունից հայտնել են, որ այս գումարից ընդամենը 1341 դրամն է հատկացվում սննդի համար։ Ավելին, շեշտվում է, որ սննդի կալորիականությունը չպետք է պակաս լինի 2800-ից, այստեղ էլ արդեն հարց է առաջանում՝ ամենօրյա թանկացումների ֆոնին արդյո՞ք ստացվում է 1340 դրամով ապահովել անազատության մեջ գտնվող անձանց պատշաճ սննդով։
Ուշագրավ է, որ թեև սննդի մասով ծախսի գումարը վերջին ամիսների ընթացքում չի ավելացվել, սակայն Factor TV-ին հասած տեղեկությունների համաձայն՝ մեր այցից հետո սննդի որակն էականորեն բարելավվել է։
Մանրամասները՝ տեսանյութում։
Ռոզա Վարդանյան
