06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Ադրբեջանի գազն օգոստոսի 1-ից Թուրքիայով կմատակարարվի Սիրիա
24.07.2025 | 21:27
Ադրբեջանական բնական գազը Թուրքիայի տարածքով կսկսի Սիրիային մատակարարվել արդեն օգոստոսի 1-ից։ Այս մասին հաղորդում է թուրքական Akşam-ը՝ հղում անելով նախագծին մոտ կանգնած աղբյուրներին, փոխանցում են ադրբեջանական լրատվամիջոցները։
Նշվում է, որ առաջին փուլով նախատեսվում է տարեկան մատակարարել 1,2 միլիարդ խորանարդ մետր գազ: Վառելիքը հիմնականում կօգտագործվի Սիրիայի Հալեպ և Հոմս նահանգների համակցված ցիկլի էլեկտրակայաններում՝ էլեկտրաէներգիա արտադրելու համար։
Նախագծի հիմնական նպատակն է նպաստել երկրի ավերված էներգետիկ ենթակառուցվածքների վերականգնմանը, որը տուժել է տարիներ շարունակ տևած հակամարտությունից։ Մատակարարումները կիրականացվեն թուրքական Քիլիս քաղաքից մինչև սիրիական սահման ձգվող խողովակաշարով։
Հաղորդվում է, որ թուրքական կողմն արդեն ավարտել է խողովակաշարի կառուցումը մինչև սահման, իսկ սիրիական կողմը՝ բոլոր տեխնիկական կապերը։
Թուրքիայի պետական էներգետիկ ընկերությունը՝ BOTAŞ-ը և ադրբեջանական SOCAR-ը իրականացնում են օբյեկտի շահագործումը սկսելու համար անհրաժեշտ վերջնական փորձարկումներն ու ստուգումները։
«Ադրբեջանի որոշումը կնպաստի ինչպես Սիրիայի հետհակամարտային վերականգնմանը, այնպես էլ Թուրքիան տարածաշրջանային էներգետիկ հանգույցի վերածելու ծրագրերին»,- գրում է լրատվամիջոցը՝ նշելով, որ Քիլիսից մինչև Սիրիայի հետ սահման խողովակաշարի անցկացումն արդեն ավարտվել է։
Դամասկոսը նաև ձեռնարկել է բոլոր անհրաժեշտ քայլերը գազ ներմուծելու համար։
Հիշեցնենք, որ հուլիսի 12-ին Սիրիայի անցումային շրջանի նախագահ Ահմեդ ալ-Շարաան այցելել էր Բաքու և բանակցություններ անցկացրել Ադրբեջանի նախագահ Իլհամ Ալիևի հետ։ Պայմանավորվածություն էր ձեռք բերվել ադրբեջանական գազի Սիրիա մատակարաման, կողմերի միջև ստորագրվել է համաձայնագիր։
Ի դեպ, միջազգային լրատվամիջոցները նաև հայտնում են, որ Բաքվում Սիրիայի հարցով բանակցություններ են անցկացվելու։
Թարգմանությունը՝ Էմմա Չոբանյանի
