29.06.2026 | 20:51
«Հարյուրավոր աշխատանքից ազատվածնե՞ր». Նարեկ Կարապետյանի պնդման հետքերով․ ՏԵՍԱՆՅՈւԹ
Դիանա Գասպարյանի սկեսրոջը մեղադրանք է առաջադրվել
Հասարակություն
22.07.2025 | 17:43
Factor TV-ի տեղեկություններով՝ Վաղարշապատ համայնքի նախկին ղեկավար Դիանա Գասպարյանի սկեսրոջը մեղադրանք է առաջադրվել։ Թե որ գործի շրջանակներում, որ հոդվածի հատկանիշներով՝ Հակակոռուպցիոն կոմիտեն չի մեկնաբանում։
Factor TV-ն փորձեց կապ հաստատել Դիանա Գասպարյանի հետ, սակայն հեռախոսազանգին պատասխանեց մի տղամարդ և ասաց, որ սխալ ենք զանգել, ինքը Դիանա Գասպարյան չի ճանաչում։ Ուշագրավ է, որ մինչ այս այլ առիթով զանգահարել էինք նույն հեռախոսահամարով և խոսել էինք Գասպարյանի հետ։
Հիշեցնենք՝ նախորդ շաբաթ մեղադրանք էր առաջադրվել նաև Գասպարյանին, սակայն այս դեպքում ևս իրավապահ մարմինները զերծ են մնում գործով մանրամասներ հայտնելուց։
Նախկին համայնքապետի և նրա ընտանիքի շուրջ աղմկահարույց պատմությունների պակաս չկա։ Դեռևս 2023-ի դեկտեմբերին «Հետք»-ը բացահայտել էր, որ Գասպարյանի սկեսուրը Էջմիածնում ապօրինի շինարարություն էր սկսել։ Մասնավորապես, Գասպարյանի ամուսնու ընտանիքը Էջմիածնում առանձնատների կառուցման բիզնես էր սկսել առանց շինթույլտվության, բացի այդ, համայնքապետի ընտանիքին 1.2 հեկտար հող անցել էր կասկածելի հանգամանքներում. Արաքս համայնքի ավագանու ՔՊ-ական անդամ Շահեն Շահինյանը հողը գնել էր Վաղարշապատի համայնքապետարանի աճուրդից, ապա օտարել Վաղարշապատի քաղաքապետի սկեսրոջը պատկանող «Նարե պլյուս» ընկերությանը։ Այս բացահայտումների հիման վրա Հակակոռուպցիոն կոմիտեում նախաձեռնվեց քրեական վարույթ, Դիանա Գասպարյանը հարցաքննվեց։
Շաբաթներ առաջ էլ հայտնի դարձավ, որ Գասպարյանի ամուսնու ընտանիքին պատկանող գազալցակայանում տեղի ունեցած սպանությունը փորձել են կոծկել։
Factor TV-ի տեղեկություններով՝ այս դեպքը տեղի է ունեցել մարտի 22-ի կեսգիշերն անց Վաղարշապատ համայնքի ղեկավար Դիանա Գասպարյանի սկեսրայրին՝ Աշոտ Միրզոյանին պատկանող գազալցակայանում։ Այդ օրը կրակոցներ էին հնչել Գասպարյանի ամուսնու ընտանիքին պատկանող ԱԳԼՃԿ-ում, ինչի հետևանքով հրազենային վիրավորում էր ստացել 36-ամյա Արթուր Պարոնյանը, որը «Էջմիածին» բժշկական կենտրոնում գիտակցության չգալով, մահացել էր։
Ավելի ուշ տեղեկություններ տարածվեցին, որ դեպքի առթիվ իրավապահները խուզարկել են նաև Դիանա Գասպարյանին և ամուսնուն պատկանող առանձնատունը։
Հիշեցնենք՝ մայիսի 15-ին Վաղարշապատ համայնքի ղեկավար Դիանա Գասպարյանը հայտարարել էր մանդատը վայր դնելու մասին, պատճառաբանելով, որ ցանկանում է ժամանակը նվիրել ընտանեկան հանգստին։
Ռոզա Վարդանյան
