16.07.2026 | 21:58
ԿԼ. «Ալաշկերտը» վերջին վայրկյաններին փրկվեց պարտությունից ու հաղթեց հետխաղային 11-մետրանոցներով․ ՏԵՍԱՆՅՈՒԹ
Իսրայելը և Սիրիան հրադադար հայտարարելու մասին են պայմանավորվել
Քաղաքականություն
19.07.2025 | 11:43
Իսրայելը և Սիրիան հասել են հրադադարի համաձայնության՝ Սիրիայի Էս-Սուվեյդե նահանգում լարվածության աճի ֆոնին, որտեղ դրուզների և բեդվինների միջև ինտենսիվ բախումների հետևանքով տասնյակ հազարավոր մարդիկ հարկադրված են եղել լքել իրենց տները, հաղորդում է Euronews-ը։
Հրադադարի մասին տեղեկությունը շաբաթ վաղ առավոտյան հայտնել է ԱՄՆ-ի դեսպանը Թուրքիայում և Սիրիայի հարցով հատուկ դեսպան Թոմ Բարրաքը։
Ավելի վաղ Իսրայելի զինված ուժերը մի քանի հարվածներ էին հասցրել Սիրիայի տարածքին, ներառյալ մայրաքաղաք Դամասկոսին՝ այսպես կոչված «ռազմական միջամտությունների» շրջանակում՝ դրուզական փոքրամասնությանը պաշտպանելու նպատակով։
Էս-Սուվեյդե նահանգում իրավիճակը սրվել է այն բանից հետո, երբ վերսկսվել են բախումները դրուզական զինված խմբավորումների և կառավարական աջակցություն վայելող բեդվինական կլանների միջև։ Սիրիայի նախագահ Ահմեդ աշ-Շառան զգուշացրել է, որ պատրաստ է նորից զորքեր մտցնել նահանգ՝ մարտերը ճնշելու համար, որոնց հետևանքով տասնյակ հազարավոր մարդիկ տարհանվել են։
Բարրաքը հրադադարի մասին հայտարարել է X հարթակում արված գրառման միջոցով՝ նշելով, որ ԱՄՆ-ի գլխավորած խաղաղ նախաձեռնությունը ստանում է տարածաշրջանի բազմաթիվ երկրների աջակցությունը։
«Իսրայելի վարչապետ Նեթանյահուն և Սիրիայի նախագահ Ահմեդ աշ-Շառան՝ ԱՄՆ-ի, Մարկո Ռուբիոյի աջակցությամբ, համաձայնել են հրադադարի, որը աջակցվում է Թուրքիայի, Հորդանանի և հարևան երկրների կողմից»,-գրել է Բարրաքը։
