29.04.2026 | 17:33
Ազատ ոճի ըմբշամարտի Հայաստանի հավաքականն ամփոփել է Եվրոպայի առաջնությունը․ ՏԵՍԱՆՅՈՒԹ
ՀԱԳՄ նիստում քննարկվել են երկրի տնտեսության առջև ծառացած հրատապ և մտահոգություն առաջացնող խնդիրներ. Ներսես Կարամանուկյանը՝ ՀՀ նախագահին
Քաղաքականություն
16.07.2025 | 19:55
Հանրապետության նախագահ Վահագն Խաչատուրյանն ընդունել է Հայաստանի արդյունաբերողների և գործարարների միության (ՀԱԳՄ) փոխնախագահ Ներսես Կարամանուկյանին: Այս մասին տեղեկացնում են նախագահի աշխատակազմից։
ՀԱԳՄ փոխնախագահը շնորհակալություն է հայտնել ընդունելության համար և տեղեկացրել, որ վերջերս անցկացված միության նախագահության նիստում, ի թիվս այլ հարցերի, քննարկվել են երկրի տնտեսության առջև ծառացած հրատապ և մտահոգություն առաջացնող խնդիրներ, որոնց լուծման գործընթացում միությունը պատրաստ է մասնակցել իր փորձագիտական ներուժով:
Նա նշել է, որ քննարկումները հիմնականում վերաբերել են վերականգնվող էներգետիկայի զարգացմանը, ինչպես նաև տրանսպորտային հաղորդակցությունների ուղիների կատարելագործմանը։ Կարամանուկյանը հայտնել է, որ այս ուղղություններով ՀԱԳՄ-ն իրականացրել է որոշակի վերլուծություններ և հետազոտություններ, որոնք պատրաստ է ներկայացնել՝ ստանալու հետագա աշխատանքների համար անհրաժեշտ ուղղորդումներն ու ձևավորելու համագործակցության հնարավորություններ։
Նախագահ Վահագն Խաչատուրյանը կարևորել է այս ձևաչափով հանդիպումները՝ ընդգծելով Հայաստանի արդյունաբերողների և գործարարների միության շարունակական ջանքերը՝ միտված կառավարությանն ու գործող իշխանությանը մասնագիտական աջակցություն ցուցաբերելուն՝ արդյունավետ որոշումների կայացման գործընթացում:
«Տարիներ շարունակ ձեր գործունեությամբ փորձել եք աջակցել կառավարությանը և գործող իշխանությանը արդյունավետ որոշումներ կայացնելու առումով։ Շատ կարևոր է ձեր ակտիվությունը։ Դուք ունեք բանիմաց փորձագետներ, և նրանց կարծիքը արժեքավոր է»,- նշել է Վահագն Խաչատուրյանը։
Նախագահը բարձր է գնահատել ՀԱԳՄ գործունեությունն ու պատրաստակամությունը՝ ներգրավվելու խնդիրների համատեղ քննարկման և լուծումների մշակման գործընթացներում՝ ընդգծելով արագ արձագանքելու և իրավիճակը խորությամբ վերլուծելու միության կարողությունները:
