Քաղաքականություն
15.07.2025 | 20:09
Ադրբեջանի նախագահ Իլհամ Ալիևի հատուկ ներկայացուցիչ Էլչին Ամիրբեկովը Հունաստան կատարած աշխատանքային այցի ընթացքում հարցազրույց է տվել երկրի պետական ERT հեռուստաալիքին։ Ադրբեջանական լրատվամիջոցների փոխանցմամբ՝ զրույցի ընթացքում Ամիրբեկովն անդրադարձել է Հայաստանի հետ խաղաղության գործընթացին՝ նշելով, որ խաղաղության համաձայնագրի տեքստը համաձայնեցվել է 2025 թվականի մարտին, և կողմերը շատ մոտ են դրա ստորագրմանը։
Ամիրբեկովը կրկին ադրբեջանական քարոզչական թեզերն է ներկայացրել՝ խոսելով պայմանագրի կնքման խոչընդոտներից։
Մասնավորապես, պատմելով «համաձայնագրի ստորագրմանը խոչընդոտող գործոնների մասին»՝ նա մատնանշել է Ադրբեջանի նկատմամբ տարածքային պահանջները, որոնք «մնում են Հայաստանի Սահմանադրության մեջ, որպես հիմնական խոչընդոտներից մեկը, որը հակասում է խաղաղության համաձայնագրի բովանդակությանն ու ոգուն»։
Բացի այդ, նա հայտարարել է Մինսկի խումբը և ԵԱՀԿ մյուս ինստիտուտները վերացնելու անհրաժեշտության մասին:
Ամիրբեկովը վստահություն է հայտնել, որ «երկու հարցերն էլ պարտադիր վաղ թե ուշ դրական լուծում կստանան»։
Թարգմանությունը՝ Էմմա Չոբանյանի
