07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
Թրամփը Պուտինին 50 օր է տվել՝ Ուկրաինայի հարցով համաձայնության հասնելու համար
Քաղաքականություն
14.07.2025 | 21:40
ԱՄՆ իշխանությունները Ռուսաստանի առևտրային գործընկերների համար կսահմանեն 100% երկրորդային մաքսատուրքեր, եթե Ուկրաինայում 50 օրվա ընթացքում խաղաղության համաձայնագիր ձեռք չբերվի։ Այս մասին ասել է ԱՄՆ նախագահ Դոնալդ Թրամփը Սպիտակ տանը ՆԱՏՕ-ի գլխավոր քարտուղար Մարկ Ռյուտեի հետ հանդիպման ժամանակ։
«Եթե մենք 50 օրվա ընթացքում համաձայնության չգանք, կլինեն երկրորդային մաքսատուրքեր։ Եվ դրանք կլինեն 100%-ի սահմաններում։ Ես առևտուրն օգտագործում եմ բազմաթիվ նպատակներով։ Այն հրաշալի է պատերազմները վերջ դնելու համար»,- ասել է Թրամփը։
Նա ասել է, որ Ուկրաինայում խաղաղության բանակցություններում «անընդհատ խոսակցություններ» են ընթանում, այդ թվում՝ անմիջականորեն իր և Վլադիմիր Պուտինի միջև։
«Եվ հետո հրթիռները թռչում են Կիևի վրա և սպանում մարդկանց։ Դա պետք է դադարեցվի», – պահանջել է ԱՄՆ նախագահը։
Թրամփը հավելել է, որ «հիասթափված է Պուտինից» և ամիսներ առաջ հույս ուներ նրա հետ գործարք կնքել։
Լրագրողների հարցին՝ արդյո՞ք Միացյալ Նահանգները և նրա դաշնակիցները պլանավորում են Patriot հակաօդային պաշտպանության համակարգեր մատակարարել Ուկրաինային, Թրամփը պատասխանել է, որ դա տեղի կունենա «մի քանի օրվա ընթացքում»։
«Մենք ունենք մեկ երկիր, որն ունի 17 Patriot համակարգ, որոնք պատրաստվում են ուղարկման։ Նրանց դրանք պետք չեն լինելու։ Այսպիսով, մենք բանակցելու ենք, թե որտեղ են այդ 17 համակարգերը գնալու՝ դրանց մեծ մասը։ Նրանք գնալու են պատերազմի կողմը»,- հավելել է Թրամփը։
Նրա խոսքով՝ Patriot-ի գործարքը կներառի մի քանի երկրներ, որոնք ունեն այդ համակարգերը։ Նրանք «պատրաստվում են փոխանակել և փոխարինել» դրանք, ասել է Թրամփը՝ նշելով, որ այդ աշխատանքը կհամակարգի Ռյուտեն։
Ավելի վաղ Թրամփը հայտարարել էր, որ Վաշինգտոնը պատրաստվում է Patriot համակարգեր վաճառել եվրոպացիներին՝ դրանք հետագայում Կիևին մատակարարելու համար։
«Ուկրաինան իսկապես կստանա հսկայական քանակությամբ ռազմական տեխնիկա՝ թե՛ ՀՕՊ, թե՛ հրթիռներ և զինամթերք», – Սպիտակ տանը հայտարարել է Ռյուտեն։
Թարգմանությունը՝ Էմմա Չոբանյանի
