05.04.2026 | 21:21
Բախվել են VAZ և KIA մակնիշների ավտոմեքենաները․ կան տուժածներ և զոհ
Էրդողանը հուլիսի 12-ին «պատմական ելույթով» հանդես կգա․ թուրք պաշտոնյա
Քաղաքականություն
10.07.2025 | 18:41
Թուրքիայի նախագահ Ռեջեփ Թայիփ Էրդողանը հուլիսի 12-ին պատրաստվում է հանդես գալ ելույթով, որը կառավարության խոսնակ Օմեր Չելիքն անվանել է «պատմական», մինչ Թուրքիան պատրաստվում է ներկայացնել ահաբեկչության վերացմանն ուղղված իր ազգային ռազմավարության հաջորդ փուլը, գրում է Turkiye today-ը։
«Շաբաթ առավոտյան նախագահը պատմական ելույթ կունենա։ Ես բոլոր քաղաքացիներին հրավիրում եմ լսել այն»,- ասել է Չելիքը։
Տեղական լրատվամիջոցների հետ զրույցում նա նշել է, որ ահաբեկչական կազմակերպությունների հետ կապված զինաթափման գործընթացը (նկատի ունենալով PKK-ն) ընթանում է ըստ ծրագրի։ Չելիքն ընդգծել է՝ նախաձեռնությունն ամբողջությամբ կվարվի ներքին կառույցների կողմից։
«Մենք բացարձակապես չենք ընդունում երրորդ աչքն այս գործընթացում։ «Թուրքիա՝ առանց ահաբեկչության»․ այժմ սա Թուրքիայի Հանրապետության պետական քաղաքականությունն է»,- ասել է Չելիքը։
Պաշտոնյան նշել է, որ զինված խմբավորումների հանձնվող անդամներին կվերաբերվեն հանցավոր գործունեության մեջ իրենց ներգրավվածության հիման վրա, «տարբերություն կլինի հանցագործություններ կատարածների և չկատարածների միջև։ Եթե մեկը հանձնվում է և հանցագործություն չի կատարել, նրան ոչինչ չի պատահում»։ Նա ընդգծել է՝ գործող օրենքներն արդեն իսկ թույլ են տալիս մեղմ վերաբերմունք ցուցաբերել ակտիվ հակամարտության ընթացքում հանձնվողների նկատմամբ, եթե նրանք չեն մասնակցել անօրինական գործողությունների։
Թուրքիայի խորհրդարանում հանձնաժողով կստեղծվի՝ գործընթացի իրականացումը ղեկավարելու համար:
Չելիքը հերքել է այն պնդումները, որ նախաձեռնությունը վտանգում է Թուրքիայի ազգային միասնությունը:
«Մենք սա իրականացնում ենք մեկ հայրենիքի, մեկ ազգի, մեկ պետության և մեկ դրոշի սկզբունքով»,- ասել է նա։
Հավելենք, որ նախօրեին Քուրդիստանի աշխատավորական կուսակցության (PKK) առաջնորդ Աբդուլլահ Օջալանը կոչ էր հրապարակել «Խաղաղության և ժողովրդավարական հասարակության գործընթացի» շրջանակում․ նա 1999 թվականից ի վեր առաջին նման տեսաուղերձում պաշտպանել էր քաղաքական և սոցիալական խաղաղությունը զինված մեթոդներից վեր դասող մոտեցումը։ Օջալանն այդ հայտարարությունն արել էր ուրբաթ Հյուսիսային Իրաքում կայանալիք PKK-ի զինյալների առաջին խմբի կողմից զենքերը վայր դնելու արարողությունից առաջ։
Թարգմանությունը՝ Էմմա Չոբանյանի
