Իսրայելը հարվածներ է հասցրել Եմենում հութիների օյեկտներին՝ երեք նավահանգստի և էլեկտրակայանի

Իսրայելական բանակը հարվածներ է հասցրել Եմենի Հոդեյդա, Ռաս Իսա և Աս-Սալիֆ նավահանգիստներին, ինչպես նաև Ռաս Կանաթիբ էլեկտրակայանին։ Հաղորդվում է, որ հարձակման ժամանակ օգտագործվել են ռազմական հետախուզության և Իսրայելի ռազմածովային ուժերի տվյալները, գրում է DW-ի ռուսական ծառայությունը։

Ըստ իսրայելական կողմի՝ նշված նավահանգիստներն «օգտագործվում են հութիների ահաբեկչական ռեժիմի կողմից իրանական ռեժիմից զենք տեղափոխելու համար, որն օգտագործվում է Իսրայելի պետության և նրա դաշնակիցների դեմ ահաբեկչական գործողություններ իրականացնելու համար»։

Իսրայելական կողմը հավելել է, որ Ռաս Իսա նավահանգիստը նաև այն վայրն է, որտեղ ոչնչացվել է 2023 թվականի նոյեմբերին հութիների կողմից գրավված Galaxy Leader բեռնատար նավը. ըստ իսրայելական բանակի՝ եմենական արմատական խմբավորումը դրա վրա տեղադրել է ռադար՝ այլ նավերի շարժումներին հետևելու համար՝ «հետագա ահաբեկչական գործունեության» նպատակով։

Ինչ վերաբերում է Ռաս Կանաթիբ էլեկտրակայանին, այն ծառայել է որպես «էլեկտրաէներգիայի կարևոր աղբյուր հութիների ռեժիմի ռազմական գործողությունների համար»։

Հութիներն իրենց հերթին հայտարարել են, որ «Եմենի ռազմաօդային ուժերը դիմակայում են» Իսրայելի ագրեսիային։

Հավելենք, որ 2023 թվականի հոկտեմբերին  ՀԱՄԱՍ-ի կողմից Իսրայելի վրա հարձակումից և Իսրայելի բանակի կողմից Գազայի հատվածում ռազմական գործողություն սկսելուց հետո հութիները սկսել են հրթիռներով և անօդաչու թռչող սարքերով հարվածներ հասցնել Իսրայելին՝ որպես պաղեստինցիների հետ համերաշխության նշան։ Հութիները նաև սկսել են հարձակվել Կարմիր ծովում և Ադենի ծոցում գտնվող նավերի վրա։ Արդյունքում, նավագնացության բազմաթիվ ընկերություններ հրաժարվել են Սուեզի ջրանցքի երթուղուց։

Մարտի կեսերին Միացյալ Նահանգները Եմենում լայնածավալ ռազմական գործողություն է սկսել՝ նավերի վրա հութիների հարձակումները դադարեցնելու համար։ Ամերիկյան բանակը, ըստ սեփական տվյալների, իրականացրել է ավելի քան 800 հարված և ոչնչացրել հարյուրավոր զինյալների։ Ապրիլին ԱՄՆ զինված ուժերը հայտնել էին Ռաս Իսա նավահանգստի ոչնչացման մասին։ Եմենցի ապստամբների հայտարարությունների համաձայն՝ ամերիկյան հարվածների հետևանքով զոհվել է շուրջ 300 մարդ։ Այս տվյալները հնարավոր չէ ստուգել անկախ աղբյուրներից։ Մայիսի սկզբին ԱՄՆ նախագահ Դոնալդ Թրամփը հայտարարել էր հութիների հանձնվելու մասին։

Ըստ The Times of Israel-ի՝ միայն 2024 թվականին հութիները Իսրայելի վրա արձակել են ավելի քան 200 հրթիռ և 170 անօդաչու թռչող սարք։ Դեկտեմբերի 19-ին՝ այդ հարվածներից մեկից հետո, Իսրայելի ռազմաօդային ուժերն առաջին հարվածն էին հասցրել ապստամբների կողմից վերահսկվող Եմենի մայրաքաղաք Սանային և մի քանի նավահանգիստների։ Մայիսի 4-ին հութիների կողմից արձակված հրթիռն ընկել էր Թել Ավիվի Բեն Գուրիոն միջազգային օդանավակայանի մոտ։

Ի պատասխան՝ Իսրայելը հարվածել էր Եմենի ափին գտնվող հութիների ենթակառուցվածքներին, այդ թվում՝ Հոդեյդա նավահանգստին։

Թարգմանությունը՝ Էմմա Չոբանյանի