06.10.2026 | 19:45
«Երևան Մոլ»-ից «Շանթ» ու «Արմենիա TV»․ ինչո՞ւ են Դատախազություն կանչել Միքայել Մինասյանին ու կնոջը․ ՏԵՍԱՆՅՈՒԹ
Միրզոյանն ու Արաղչին տարածաշրջանում վերջին զարգացումներն են քննարկել․ Իրանի ԱԳ նախարարը շնորհակալություն է հայտնել ՀՀ կառավարությանը
Քաղաքականություն
01.07.2025 | 19:32
Հայաստանի և Իրանի ԱԳ նախարարներ Արարատ Միրզոյանն ու Աբբաս Արաղչին հեռախոսազրույց են ունեցել՝ քննարկելով տարածաշրջանում վերջին զարգացումները։ Իրանական կողմի հաղորդմամբ՝ կողմերը մտքեր են փոխանակել երկկողմ հարաբերությունների, տարածաշրջանում վերջին զարգացումների, ինչպես նաև «Իրանի տարածքի դեմ Իսրայելի և ԱՄՆ-ի իրականացրած ագրեսիայից հետո փոխադարձ հետաքրքրություն ներկայացնող հարցերի շուրջ»։
Տարածաշրջանում ստեղծված իրավիճակը բացատրելով՝ Իրանի գլխավոր դիվանագետը շեշտել է «միջազգային հանրության և ՄԱԿ-ի պատասխանատվությունը՝ պատասխանատվության ենթարկելու Միացյալ Նահանգներին և սիոնիստական ռեժիմին Իրանի ազգային ինքնիշխանության և տարածքային ամբողջականության դեմ ագրեսիայի, ինչպես նաև բոլոր միջազգային սկզբունքների և օրենքների խախտման համար»։
Արաղչին նաև շնորհակալություն է հայտնել Երևանին իր դիրքորոշման համար և բարձր գնահատել Հայաստանի կառավարության ջանքերն ու օգնությունը՝ երկրի դեմ պարտադրված 12-օրյա պատերազմի ընթացքում Իրանի քաղաքացիների հյուպատոսական հարցերը դյուրացնելու համար։
Ըստ իրանական կողմի՝ «Հայաստանի արտաքին գործերի նախարարը վերահաստատել է իր դատապարտումը Իսրայելի և ԱՄՆ-ի կողմից Իրանի Իսլամական Հանրապետության դեմ ագրեսիայի համար և ողջունել ռազմական գործողությունների դադարեցումը, որը կհանգեցնի կայունության և տարածաշրջանում լարվածության նվազման»։
Թարգմանությունը՝ Էմմա Չոբանյանի
