07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
ՄԱԳԱՏԷ-ին այժմ ավելի դժվար կլինի հետևել իրանական ուրանին. Bloomberg
Քաղաքականություն
22.06.2025 | 13:35
«Թեև մենք դեռ սպասում ենք վնասի ամբողջական գնահատմանը, մի բան ակնհայտ է․ Իրանի հարստացված ուրանի հաշվառված պաշարների մոնիթորինգն այժմ զգալիորեն բարդացել է»,-նշում է Bloomberg գործակալության վերլուծաբանը, փոխանցում է BBC-ի ռուսական ծառայությունը։
Նշվում է, որ Իրանի դեմ հարձակումներից առաջ ՄԱԿ-ի վերահսկողությամբ գործող կազմակերպությունը հետևում էր ավելի քան 9000 կիլոգրամ նյութի (այդ թվում՝ 409 կիլոգրամ վառելիքի, որն իր որակով մոտ է մարտական մակարդակին)։
Գործակալությունը շեշտում է, որ նույնիսկ ուրանի հարստացման արտադրամասերին և պահեստարաններին հասցված տեղային վնասը կարող է խոչընդոտել ՄԱԳԱՏԷ-ի՝ Իրանում իրականացվող վերահսկողության գործընթացին։
«Եթե դրան ավելացնենք Իրանի հայտարարությունը, որ հարստացված ուրանի զգալի քանակություն տեղափոխվել է դեռ չհայտարարված վայրեր, ՄԱԳԱՏԷ-ն կանգնած է լուրջ խնդրի առջև՝ ինչպես իրականացնել որևիցե ստուգում իրանական ուրանի վերաբերյալ»,-նշվում է հրապարակման մեջ։
ՄԱԳԱՏԷ-ի ղեկավար Ռաֆայել Գրոսսին հայտարարել է Վիեննայում կառավարման խորհրդի «հատուկ նիստ» գումարելու մասին։ Նա այսօր՝ հունիսի 22-ին, X սոցիալական ցանցում գրել է, որ նիստը տեղի կունենա երկուշաբթի։
Հիշեցնենք՝ ԱՄՆ նախագահ Դոնալդ Թրամփը ավելի վաղ հայտարարել է, որ ամերիկյան ավիացիան հարվածներ է հասցրել Իրանում գտնվող երեք միջուկային օբյեկտներին՝ Ֆորդոյում, Նաթանզում և Սպահանում։
Ամերիկայի նախագահը նաև ուղերձով է հանդես եկել։ Իր ելույթում, որը տևել է երեք րոպե, Թրամփն ասել է, որ Իրանի ապագան կամ խաղաղություն է, կամ ողբերգություն, և կան բազմաթիվ այլ թիրախներ, որոնք կարող են խոցվել ամերիկացի զինվորականների կողմից: Նա հայտարարել է, որ եթե խաղաղության գործընթացն արագ տեղի չունենա, ապա ԱՄՆ-ն այլ նպատակներ է հետապնդելու՝ ճշգրտությամբ, արագությամբ և հմտությամբ:
