Գիշերը Սամվել Կարապետյանն իրավապահների հետ դուրս է եկել իր առանձնատնից և հեռացել․ ՏԵՍԱՆՅՈՒԹ

Կեսգիշերն անց, ժամը մոտ 2։30-3։00-ի սահմաններում, ռուսաստանցի, ազգությամբ հայ գործարար, «Տաշիր Գրուպ» ձեռնարկությունների սեփականատեր Սամվել Կարապետյանը դուրս է եկել Երևանում գտնվող իր առանձնատնից և իրավապահների հետ հեռացել։ Լրագրողների հարցին, թե՝ ո՞ւր եք տանում, գործարարին ուղեկցող փոխոստիկանապետ Վարդան Վարդանյանը չի պատասխանել։

Հեռանալիս Կարապետյանն իր  տան առջև իրեն սպասող աջակիցներին ասել է.  «Ես մեր եկեղեցու, մեր ժողովրդի կողքին եմ: Ինչքան էլ փորձեն սևացնել, ոչ մի էլեկտրական ցանց… թքած ունեմ իրենց վրա էլ, իրենց էլցանցի վրա էլ: Ամեն ինչ լավ է լինելու, ժողովուրդը մեկ է իր խոսքն ասելու է, իրենք հասկանալու են, որ սխալվեցին»:

Ապա դիմելով իր աջակիցներին հավելել է․ «Չմոռանաք, լավ դաս կտաք սրանց»:

Հիշեցնենք որ երեկ՝ միջադեպից ժամեր առաջ, միլիարդատեր գործարարն ասել էր. «Քանի որ ես միշտ եղել եմ հայ ժողովրդի ու հայ եկեղեցու կողքին, ունենալու եմ անմիջական մասնակցություն. եթե չհաջողվի քաղաքական գործիչներին, ուրեմն մենք էլ մեր ձևով ենք մասնակցելու այդ ամեն ինչին»

Քիչ անց վարչապետ Փաշինյանը գրառմամբ արձագանքել էր այս հայտարարությանը. – «Պոռնկաբարո «հոգևորականներն» ու նրանց պոռնկաբարո «բարեգործներն» ինչո՞ւ են ակտիվացել։ Ոչինչ՝ նորից կպասիվացնենք։ Ընդ որում՝ ընդմիշտ»:

Ապա հայտնի դարձավ, որ հատուկջոկատայինները խուզարկում են Կարապետյանի՝ Երևանում գտնվող տունը, կան բերման ենթարկվածներ։

Նշենք, որ Սամվել Կարապետյանի կարգավիճակը դեռևս հայտնի չէ:

Անահիտ Խաչատրյան