17.02.2026 | 23:22
ՀՀ ԱԳ նախարարի տեղակալը Հռոմում ներկայացրել է COP17-ի Հայաստանի նախագահության առաջնահերթությունները
Նեթանյահուն հայտարարել է, որ Իսրայելը Իրանի միջուկային և բալիստիկ հրթիռային սպառնալիքները ոչնչացնելու իր նպատակներին հասնելու «ճանապարհին է»
Քաղաքականություն
16.06.2025 | 18:30
Իսրայելը «վերահսկում է Թեհրանի երկինքը»։ Այս մասին հայտարարել է Իսրայելի վարչապետ Բենիամին Նեթանյահուն՝ կրկնելով Իսրայելի բանակի խոսնակի՝ օրվա սկզբում արված հայտարարությունները, գրում է The Times of Israel-ը։
«Սա փոխում է ամբողջ արշավը»,- ասել է նա Իսրայելի կենտրոնում գտնվող Թել Նոֆ ավիաբազա այցելության ժամանակ, որին միացել են պաշտպանության նախարար Իսրայել Կացը և պաշտպանության բանակի շտաբի պետ, գեներալ-լեյտենանտ Էյալ Զամիրը։
Նեթանյահուն ասում է, որ Իսրայելը Իրանի միջուկային և բալիստիկ հրթիռային սպառնալիքները ոչնչացնելու՝ իր նպատակներին հասնելու «ճանապարհին է»։
«Երբ մենք վերահսկում ենք Թեհրանի երկինքը, մենք հարվածում ենք այս թիրախներին, ռեժիմի թիրախներին՝ ի տարբերություն Իրանի հանցավոր ռեժիմի, որը թիրախավորում է մեր քաղաքացիներին և գալիս է սպանելու երեխաներին ու կանանց»,- հայտարարել է Նեթանյահուն։
Նա նշել է, թե Իսրայելը Թեհրանի բնակիչներին ասում է՝ «դուրս եկեք», մինչ իսրայելական օդուժը հարվածում է մայրաքաղաքում գտնվող թիրախներին։
Հիշեցնենք, որ Իսրայելը հունիսի 13-ին հարձակում է սկսել Իրանի վրա՝ թիրախավորելով միջուկային օբյեկտները, ռազմական և էներգետիկ ենթակառուցվածքները: Հարվածների հետևանքով զոհվել են բարձրաստիճան զինվորականներ, միջուկային գիտնականներ և խաղաղ բնակիչներ։ Ի պատասխան՝ Իրանը հարվածներ է հասցնում Իսրայելի տարածքին:
Թարգմանությունը՝ Էմմա Չոբանյանի
