16.07.2026 | 23:29
Հետաքննությունը պարզել է, որ Ալիևի թոռներն անօրինական կերպով օգտագործում են պաշտոնական լիմուզիններն և անվտանգության մեքենաները
ՌԴ-ն Ուկրաինային է փոխանցել ևս 1200 զոհվածների մարմիններ
Քաղաքականություն
15.06.2025 | 15:15
Ռուսաստանը Ուկրաինային փոխանցել է ևս 1200 զոհվածների մարմիններ։ Այս մասին հայտնել է ուկրաինական ռազմագերիների հարցերով համակարգող շտաբը։
«Ուկրաինա է վերադարձվել ևս 1200 մարմին, որոնք, ըստ ռուսական կողմի, Ուկրաինայի քաղաքացիներ են, այդ թվում՝ զինծառայողների», – ասված է շտաբի հայտարարությունում, որը հրապարակվել է Telegram-ում կիրակի օրը՝ հունիսի 15-ին։
Նշվում է, որ առաջիկայում ուկրաինացի քննիչներն ու փորձագետները կանցկացնեն բոլոր անհրաժեշտ փորձաքննությունները և մարմինների նույնականացումը։ Շտաբը հավելել է, որ մարմինների փոխանցումը կատարվել է Կարմիր խաչի միջազգային կոմիտեի աջակցությամբ։
Մինչդեռ ТАСС-ը, հղում անելով անանուն աղբյուրի, հայտնում է, որ հունիսի 15-ին Ռուսաստանը Ուկրաինայից որևէ զոհվածի մարմին չի ստացել։
Հիշեցնենք՝ Ստամբուլում հունիսի 2-ին կայացած բանակցությունների ընթացքում Ռուսաստանը և Ուկրաինան պայմանավորվել են փոխանակել ծանր վիրավոր զինվորականներին և մինչև 25 տարեկան գերիներին, ինչպես նաև միմյանց փոխանցել պատերազմի ժամանակ զոհված 6000 զինծառայողի մարմին։
Հունիսի 11-ին Կիևը ստացել է 1212 զոհվածների աճյուն և Մոսկվային փոխանցել 27 ռուս զինծառայողի մարմին։ Հունիսի 13-ին Ուկրաինան հայտարարել է ևս 1200 մարմնի ստացման մասին, իսկ հունիսի 14-ին՝ ևս 1200-ի։ Այսպիսով, վերջին օրերի ընթացքում Կիևը Ռուսաստանից ստացել է մոտ 5000 զոհվածների աճյուն։ Միևնույն ժամանակ, հունիսի 9-ին, 10-ին և 12-ին տեղի են ունեցել նաև մի քանի փուլով գերիների փոխանակումներ։
