04.04.2026 | 20:03
ՃՏՊ՝ հրդեհի բռնկմամբ
ՌԴ ԱԳՆ-ն խստորեն դատապարտել է Իրանի դեմ Իսրայելի հարձակումը
Քաղաքականություն
13.06.2025 | 18:19
Ռուսաստանի ԱԳՆ-ն խստորեն դատապարտել է Մերձավոր Արևելքում իրավիճակի սրումը՝ նշելով, որ իրանական միջուկային ծրագրի շուրջ կարգավորումը չի կարող իրականացվել ռազմական ուժով և կարող է իրականացվել միայն խաղաղ ճանապարհով, գրում է Ինտերֆաքսը։
«Մենք խորը մտահոգություն ենք հայտնում Մերձավոր Արևելքում լարվածության վտանգավոր սրման վերաբերյալ: Մենք խստորեն դատապարտում ենք Իսրայելի կողմից հունիսի 13-ի գիշերը ՄԱԿ-ի կանոնադրության և միջազգային իրավունքի խախտմամբ ձեռնարկված ռազմական գործողությունները։ ՄԱԿ-ի ինքնիշխան անդամ պետության, նրա քաղաքացիների, քնած խաղաղ քաղաքների, միջուկային էներգիայի ենթակառուցվածքների օբյեկտների վրա չհրահրված ռազմական հարվածները կտրականապես անընդունելի են: Միջազգային հանրությունը չի կարող անտարբեր լինել նման վայրագությունների նկատմամբ, որոնք ոչնչացնում են խաղաղությունը և վնասում տարածաշրջանային և միջազգային անվտանգությանը»,- ասվում է հայտարարության մեջ։
Նշվում է, որ իրադարձություններին հատուկ «ցինիզմ» է հաղորդում այն փաստը, որ Իսրայելի հարձակումները կատարվել են ՄԱԳԱՏԷ-ի կառավարիչների խորհրդի նիստի ընթացքում և Իրանի ու Միացյալ Նահանգների ներկայացուցիչների միջև անուղղակի շփումների հերթական փուլի նախօրեին։ Այդպիսով, ըստ Մոսկվայի, խաթարվել են դժվարությամբ նվաճված բազմակողմ ջանքերը նպատակ ունեին նվազեցնել առճակատումը և գտնել լուծումներ, որոնք կվերացնեին իրանական խաղաղ ատոմի վերաբերյալ ցանկացած կասկած և նախապաշարմունք։
«Մենք կոչ ենք անում կողմերին զսպվածություն ցուցաբերել՝ լարվածության հետագա սրումը և տարածաշրջանի լիամասշտաբ պատերազմի մեջ գլորվելը կանխելու համար։Այս առումով մենք հիշեցնում ենք ԱՄՆ-ի պատրաստակամության մասին՝ Օմանում Իրանի միջուկային ծրագրի վերաբերյալ Իրանի հետ բանակցությունների ևս մեկ փուլ անցկացնելու»,- հայտարարում է ՌԴ ԱԳՆ-ն։
Ավելի վաղ իրանական լրատվամիջոցները հայտնել էին, որ Իրանը չեղարկել է ԱՄՆ-ի հետ միջուկային բանակցությունները, որոնք կայանելու էին Օմանում հունիսի 15-ին։
Թարգմանությունը՝ Էմմա Չոբանյանի
