23.05.2026 | 21:54
System of a Down-ը հուլիսին համերգ կտա Երևանում․ Փաշինյան
Իրանի ԶՈՒ հրամանատարը հրամայել է լայնածավալ զորավարժություններ անցկացնել՝ Իսրայելի հնարավոր հարվածի լուրերի ֆոնին
Քաղաքականություն
12.06.2025 | 17:21
Իրանի զինված ուժերի գլխավոր շտաբի պետ, գեներալ-մայոր Մոհամմադ Բաղերին հրամայել է զորավարժություններ անցկացնել՝ ուղղված երկրի պաշտպանական և զսպման կարողությունների բարձրացմանը, գրում է Mehr գործակալությունը։
Մասնավորապես, Բաղերին հրամայել է սկսել 2025 թվականի համազգային զորավարժությունների շարքը, որը հայտնի է որպես «Իշխանության ուժի զորավարժություններ» և կրելու է «Խաղաղություն նրան» կոդային տարբերակը։ Բաղերիի խոսքով՝ այս զորավարժությունների նպատակն է բարձրացնել Իրանի զինված ուժերի պաշտպանական ուժը, օպերատիվ պատրաստվածությունը և զսպման կարողությունները։
Այս տարվա զորավարժությունները նախատեսված են կանոնավոր ռազմական օրացույցի փոփոխություններով և նախատեսված են տարածաշրջանային սպառնալիքներին և հակառակորդի շարժումներին արձագանքելու համար։
Հիշեցնենք, որ ավելի վաղ միջազգային լրատվամիջոցները հայտնել էին, որ Իսրայելը դիտարկում է Իրանի դեմ առաջիկա օրերին ռազմական գործողություններ ձեռնարկելու հնարավորությունը, ամենայն հավանականությամբ՝ առանց ԱՄՆ-ի աջակցության, նույնիսկ այն դեպքում, երբ նախագահ Դոնալդ Թրամփը Թեհրանի հետ նախնական բանակցություններ է վարում միջուկային ծրագիրը կրճատելու դիվանագիտական գործարքի շուրջ։
Իսրայելն ավելի լուրջ է դառնում Իրանին միակողմանի հարված հասցնելու մտադրության հարցում, քանի որ Միացյալ Նահանգների և Իրանի միջև բանակցությունները, կարծես, ընթանում են նախնական կամ շրջանակային համաձայնագրի ուղղությամբ, որը ներառում է ուրանի հարստացման վերաբերյալ դրույթներ, ինչը Իսրայելը համարում է անընդունելի։
Թարգմանությունը՝ Էմմա Չոբանյանի
