Դավիթ Համբարձումյանին անձամբ չեմ ճանաչում, առաջադրումն անակնկալ էր. Ագնեսա Խամոյան․ ՏԵՍԱՆՅՈՒԹ

«Հայաստան» խմբակցությունը հավատարիմ լինելով իր նախկին հայտարարությանը վերահաստատում է, որ պատրաստ է պակասող 28 քվեները տալ, իսկ հավելյալ քննարկումների համար պատրաստ ենք հանդիպել «Պատիվ ունեմ»-ի հետ։ Այս մասին Factor.am-ի հետ զրույցում ասաց ԱԺ «Հայաստան» խմբակցության պատգամավոր Ագնեսա Խամոյանն՝ անդրադառնալով Սեյրան Օհանյանի այն հայտարարությանը, որ պատրաստ են աջակցել Դավիթ Համբարձումյանին վարչապետի պաշտոնում։

ՀՀԿ-ի բազայի վրա գործող «Պատիվ ունեմ» խմբակցությունը դեռ շաբաթ օրն էր հայտարարել, որ Փաշինյանին իմփինչմենթի ենթարկելու գործընթաց է սկսում՝ առաջադրելով Մասիսի քաղաքապետ Դավիթ Համբարձումյանի թեկնածությունը։

Իսկ ինչ է նշանակում «Հայաստան» խմբակցության ընդգծած «հավատարիմ լինելել իր նախկին հայտարարությանը» ձևակերպումը․ Ագնեսա Խամոյանից հետաքրքրվեցինք՝ արդյո՞ք սա նշանակում է, որ կսպասեն անվստահություն հայտնելու գործընթաց սկսելու համար անհրաժեշտ 36 քվեներից ութի ապահովմանը «Պատիվ ունեմ»-ի կողմից նոր նախագծի տակ կդնեն իրենց 28 պատգամավորների ստորագրությունը։ Նշենք, որ «Պատիվ ունեմ»-ը ունի վեց պատգամավոր։

«Ես կարծում եմ, որ պակասող 28 ձայներ ձևակերպումը շատ կարևոր է, բայց պարոն Օհանյանի այսօրվա հայտարարության մեջ կա նոր միտք՝ հավելյալ քննարկումների համար պատրաստ ենք հանդիպման»,-ասաց Ագնեսա Խամոյանը։

Ընդդիմադիր պատգամավորն անձամբ չի ճանաչում Մասիսի քաղաքապետ, ՀՀԿ-ի վարչապետի թեկնածու Դավիթ Համբարձումյանին։ «Թեկնածությունը ինձ համար անակնկալ էր, չեմ կարող գնահատել՝ հաջողություն կլինի, թե՝ չէ»,-ասաց Խամոյանը։

Մանրամասները՝ տեսանյութում։

Նարեկ Կիրակոսյան