Ուկրաինայի վրա ՌԴ-ի ինտենսիվ օդային հարձակման պատճառով Լեհաստանն օդ է բարձրացրել կործանիչները

Ուկրաինայի տարածքում Ռուսաստանի կողմից իրականացված ինտենսիվ օդային հարձակման պատճառով երկուշաբթի առավոտյան Լեհաստանի և ՆԱՏՕ-ի ինքնաթիռներն ակտիվացել են Լեհաստանի օդային տարածքում, գրում է Euronews-ը։

Լեհաստանի զինված ուժերի օպերատիվ հրամանատարության հաղորդմամբ՝ գործող ընթացակարգերի համաձայն՝ օպերատիվ հրամանատարը գործարկել է իր տրամադրության տակ գտնվող բոլոր ուժերն ու միջոցները, բարձրացվել են կործանիչների հերթապահ զույգեր, իսկ ցամաքային ՀՕՊ և ռադարային հետախուզության համակարգերը բերվել են ամենաբարձր պատրաստվածության վիճակի։

«Այս գործողությունները կանխարգելիչ բնույթ են կրում և ձեռնարկվում են անվտանգությունն ապահովելու և Լեհաստանի Հանրապետության սահմանների անմիջական մոտակայքում իրավիճակը վերահսկելու համար։ Օպերատիվ ստորաբաժանումները մշտական ​​​​պատրաստության մեջ են՝ արձագանքելու ցանկացած սպառնալիքի, որը կարող է խաթարել պետության տարածքային ամբողջականությունը կամ նրա քաղաքացիների անվտանգությունը»,- ասվում է հաղորդագրության մեջ։

Մի քանի ժամ անց Զինված ուժերի օպերատիվ հրամանատարությունը հայտնել է, որ «ուկրաինական տարածքում ռուսական ավիացիայի կողմից հրթիռային հարվածների սպառնալիքի մակարդակի նվազման կապակցությամբ, Լեհաստանի օդային տարածքում լեհական և դաշնակից ավիացիայի ակտիվ գործողությունները դադարեցվել են, իսկ տեղակայված ուժերն ու միջոցները վերադարձել են սովորական օպերատիվ գործունեությանը»։ Լեհաստանի օդային տարածքի խախտումներ չեն նկատվել։

«Լեհ զինվորականները մշտապես հետևում են Ուկրաինայի տարածքում տիրող իրավիճակին և գտնվում են մշտական ​​մարտական ​​պատրաստության վիճակում՝ Լեհաստանի օդային տարածքի անվտանգությունն ապահովելու համար։ Մենք շնորհակալություն ենք հայտնում ՆԱՏՕ-ի ռազմաօդային ուժերին դաշնակիցների աջակցության համար»,- ասվում է հաղորդագրության մեջ։

Ուկրաինայի ռազմաօդային ուժերի տվյալներով՝ հունիսի լույս 9-ի գիշերը ռուսական զորքերը գրեթե 500 անօդաչու թռչող սարք և հրթիռ են արձակել Ուկրաինայի ուղղությամբ։

Թարգմանությունը՝ Էմմա Չոբանյանի