Մասկի հայրը Մոսկվայում է․ «Իլոնը սխալ է թույլ տվել»

Ամերիկացի գործարար Իլոն Մասկի հայրը ժամանել է Մոսկվա և պատրաստվում է մասնակցել «Ապագայի ֆորում 2050» միջոցառմանը: Այն տեղի կունենա հաջորդ շաբաթվա սկզբին և նվիրված կլինի, ի թիվս այլ բաների, երիտասարդ ռուսաստանցիների հայրենասիրական դաստիարակությանը և ժողովրդագրական խնդիրների լուծմանը, փոխանցում են ռուսական լրատվամիջոցները։

Ֆորումի մեկնարկի նախօրեին Էրոլ Մասկը հարցազրույց է տվել մեկ այլ թեմայի՝ որդու և ԱՄՆ վարչակազմի կոնֆլիկտի վերաբերյալ:

Iz.ru-ին տված մեկնաբանության մեջ Մասկը քննադատել է որդուն ԱՄՆ նախագահի հետ կոնֆլիկտի համար։ Նա կարծում է, որ Իլոն Մասկը և Դոնալդ Թրամփը պարզապես շատ հոգնած են ընտրություններից հետո կատարած աշխատանքի պատճառով։

«Նրանք հինգ ամիս շարունակ մեծ սթրեսի մեջ են եղել։ Թողեք շնչեն», – ասել է գործարարի հայրը։

Նա համոզված է, որ այս իրավիճակում հաղթողը ցանկացած դեպքում պետության ղեկավարն է լինելու. «Նա նախագահն է, նա ընտրվել է… Իլոնը սխալ է թույլ տվել, կարծում եմ, բայց նա հոգնած է, նա սթրեսի մեջ է»։

Էրոլ Մասկը վստահություն է հայտնել, որ կոնֆլիկտը շուտով անցյալում կմնա և կմոռացվի։

Հիշեցնենք՝ Թրամփի և Մասկի հարաբերությունները վատթարացել են Թրամփի բյուջեի օրինագծի պատճառով, որը Մասկը քննադատել է իր սոցիալական հարթակում՝ X-ում։ Մասկը զգուշացրել է, որ օրինագիծը կհանգեցնի դաշնային բյուջեի պակասի աճին և այն անվանել է «զզվելի գարշելիություն»։ Հինգշաբթի օրը Թրամփը քննադատել է Մասկի կտրուկ արձագանքը իր «մեծ ու գեղեցիկ օրինագծի» վերաբերյալ, որն այժմ քննարկվում է Կոնգրեսում։

Շուտով Թրամփը և Մասկը սկսել են փոխադարձ կոշտ հարձակումները սոցիալական ցանցերում, ինչի արդյունքում Սպիտակ տունը և հանրապետական առաջնորդները սկսեցին շտապ գնահատել հետևանքները։ Մասկը նույնիսկ առաջարկել է Թրամփին իմփիչմենթ հայտարարել և առանց ապացույցների պնդել է, թե կառավարությունը թաքցնում է տեղեկատվությունը Թրամփի և հայտնի մանկապիղծ Ջեֆրի Էփշթեյնի կապերի մասին։ Ավելի ուշ Tesla-ի ղեկավարը, կարծես, հրաժարվել է այդ հայտարարություններից՝ շաբաթ օրը ջնջելով իր գրառումը Էփշթեյնի մասին։

ԱՄՆ նախագահ Դոնալդ Թրամփը շաբաթ օրը հասկացրել է, որ հետաքրքրված չէ վերականգնել հարաբերությունները իր նախկին դաշնակցի և նախընտրական արշավի հովանավոր Իլոն Մասկի հետ՝ նախազգուշացնելով, որ նա կարող է բախվել «լուրջ հետևանքների», եթե փորձի աջակցել ընդդիմությանը։