05.04.2026 | 21:21
Բախվել են VAZ և KIA մակնիշների ավտոմեքենաները․ կան տուժածներ և զոհ
Թրամփն ու Սի Ցզինպինը հեռախոսազրույց են ունեցել
Քաղաքականություն
05.06.2025 | 18:21
ԱՄՆ նախագահ Դոնալդ Թրամփը հեռախոսազրույց է ունեցել Չինաստանի նախագահ Սի Ցզինպինի հետ, հաղորդում է չինական պետական «Սինհուա» գործակալությունը։
Նշվում է, որ հեռախոսազրույցը տեղի է ունեցել ամերիկյան կողմի նախաձեռնությամբ։ Զրույցի մանրամասներ չեն հաղորդվում։
Նախօրեին Թրամփը հայտարարել էր, որ իրեն դուր է գալիս Չինաստանի նախագահ Սի Ցզինպինը, միաժամանակ, նշելով, որ դժվար է բանակցել չինացի առաջնորդի հետ։ Այս մասին նա գրել էր Truth Social սոցցանցում։
«Ես միշտ հավանել եմ և միշտ կհավանեմ նախագահ Սիին, բայց նա շատ կոշտ է և չափազանց դժվար է բանակցել նրա հետ»,- գրել էր Թրամփը։
Ավելի վաղ էլ Politico-ն, հղում անելով աղբյուրներին, հայտնել էր, որ Թրամփը «մոլուցքով է տարված» Սի Ցզինպինի հետ հեռախոսազրույց ունենալու գաղափարով, քանի որ կարծում է՝ դա կօգնի վերականգնել զինադադարը երկու երկրների միջև առևտրային պատերազմում։
Հիշեցնենք, որ ապրիլի 2-ին ԱՄՆ նախագահը հայտարարել էր տասնյակ երկրների նկատմամբ տարբեր չափի մաքսատուրքերի սահմանման մասին, սակայն դրանք շուտով կասեցվեցին, ԱՄՆ-ը սահմանափակվել է միայն 10% հիմնական մաքսատուրքով։ Սակայն Չինաստանի նկատմամբ սահմանված մաքսատուրքերն աստիճանաբար հասան 145%-ի և մնացին ուժի մեջ։ Իր հերթին, Չինաստանը մաքսատուրքերը բարձրացրել է մինչև 125%։
Մայիսին ԱՄՆ-ն և Չինաստանը համաձայնության եկան 90 օրով փոխադարձաբար մաքսատուրքերը նվազեցնելու մասին։
Թարգմանությունը՝ Էմմա Չոբանյանի
