10.12.2025 | 22:42
Համբարձում Մաթևոսյանը ՄԹ բնության նախարարին է ներկայացրել COP17-ի տարբերանշանն ու կարգախոսը
Մեծ Բրիտանիան պետք է վերանայի իր ռազմավարությունը՝ Ուկրաինայի «Սարդոստայն» գործողությունը աչքի առաջ ունենալով․ Economist
Քաղաքականություն
05.06.2025 | 10:35
Մեծ Բրիտանիան պետք է փոխի իր ռազմավարությունը և ռազմաբազաների գործարկման մոտեցումը․ գրում է Economist-ը:
Պարբերականը, մասնավորապես, նշում է, որ Մեծ Բրիտանիայի Թագավորական ռազմաօդային ուժերը, ինչպես նաև եվրոպական շատ երկրներ, գումար են խնայել ՝ բազաները փակելով և ինքնաթիռները մեկ վայրում տեղակայելով: Սակայն Ուկրաինայի իրականացրած «Սարդոստայն» գործողությունը պետք է դաս լինի Մեծ Բրիտանիայի համար, որ իր ընտրած ռազմավարությունը սխալ է:
Հիշեցնենք, որ հունիսի 1-ին Ուկրաինայի անվտանգության «Սարդոստայն» գործողության շրջանակներում, FPV անօդաչու թռչող սարքերը գրոհել էին ՌԴ Ռյազանի մարզի «Դյագիլևո», Մուրմանսկի մարզի «Օլենյա», Իրկուտսկի մարզի «Բելայա» և Իվանովոյի մարզի «Իվանովո» ռազմական օդանավակայանները։ Անօդաչու թռչող սարքերը արձակվել են ավիաբազաների մոտ գտնվող մայրուղում կայանված բեռնատարներից։ Ըստ ուկրաինական կողմի՝ անօդաչու թռչող սարքերը ոչնչացրել են ՌԴ ռազմավարական ավիացիոն 41 ինքնաթիռ, այդ թվում՝ А-50, Ту-95 և Ту-22 М3։
«Հարված է հասցվել ռազմավարական թևավոր հրթիռային կրիչների 34 տոկոսին, որոնք գտնվում էին իրենց բազայի օդանավակայաններում։ Մեր մարդիկ գործել են Ռուսաստանի տարբեր շրջաններում՝ երեք ժամային գոտիներում», – ասել էր Ուկրաինայի նախագահ Զելենսկին՝ հավելելով, որ Ռուսաստանի տարածքում ուկրաինական հատուկ գործողության «գրասենյակը» տեղակայված է եղել բառացիորեն ԱԴԾ (Անվտանգության դաշնային ծառայության) տարածաշրջանային վարչության կողքին։
«Այժմ Ռազմաօդային Ուժերը պետք է վերանայեն ռազմաբազաները, զինամթերքը, պահեստամասերը և վառելիքը բաշխելու իրենց մարտավարութունը»,- ասված է պարբերականի հոդվածում։ Սակայն, Economist-ը նաև նշում է, որ Միացյալ Թագավորությունը աղետալիորեն քիչ գումար ունի իր ԶՈՒ-ի արդիականացման համար:
Թարգմանությունը՝ Անահիտ Խաչատրյանի
