18.02.2026 | 14:26
Արցախում ականի վրա ադրբեջանցի սակրավոր է պայթել
Ադրբեջանի ՀԿ-ները պահանջում են «փակել Մեծամորի ատոմակայանը»
Քաղաքականություն
04.06.2025 | 17:44
Ադրբեջանական «Enviromental Protection First» հասարակական կազմակերպությունների կոալցիան այսօր ճեպազրույց է անցկացրել՝ բողոքելով Մեծամորի ատոմակայանի շարունակական շահագործման դեմ։ Ադրբեջանական լրատվամիջոցների հաղորդմամբ՝ կոալցիայի անդամ Ամին Մամեդովն անդրադարձել է Թուրքիայում գործող ավելի քան 30 ՀԿ-ների կողմից Մեծամորի ԱԷԿ-ի գործունեությունը կասեցնելուն ուղղված կոչին՝ նշելով, որ իրենց կազմակերպությունը նույնպես պահանջում է Մեծամորի ԱԷԿ-ի անհապաղ փակումը.
«Այս նախաձեռնության հիմնական հեղինակը Թուրքիայում գործող «Doğa ve Çevre» հասարակական միավորումն է: Իգդիրում վերջերս կայացած Մեծամորի ԱԷԿ-ի վնասակար գործունեությանը նվիրված միջոցառման ժամանակ թուրք բնապահպանները հատուկ հայտարարություն ընդունեցին: Հայաստանը նաև որևէ զեկույց չի հրապարակում Ադրբեջանին սահմանակից տարածքներում իրականացվող հանքարդյունաբերական գործունեության վերաբերյալ: Ես կարծում եմ, որ պետք է գործնական քայլեր ձեռնարկվեն այս կայանի գործունեությունը դադարեցնելու համար»,- ասել է նա։
«Ռուզգար» էկոլոգիական հասարակական միության նախագահ Իսլամ Մուստաֆաևը, իր հերթին, նշել է, որ Թուրքիայում ՀԿ-ների ներկայացուցիչների նման նախաձեռնությունը պատահական չէ։
«Ամեն տարի այս հարցը բարձրացվում է Ատոմային էներգիայի միջազգային կազմակերպության համաժողովներում, սակայն անհրաժեշտ քայլերը չեն ձեռնարկվում: Մենք պահանջում ենք դադարեցնել ատոմակայանի գործունեությունը, որը ռիսկեր է ստեղծում և ծայրահեղ վտանգի աղբյուր է դառնում հարևան երկրների համար: Եթե այնտեղ որևէ միջադեպ տեղի ունենա, դա հսկայական ողբերգություն կառաջացնի շրջակա չորս երկրների համար»,- ասել է նա։
Կոալիցիայի անդամ Սաբիթ Բաղիրովն էլ ասել է, որ Հայաստանում գործում է ավելի քան 900 հանքարդյունաբերական ձեռնարկություն՝ հայտարարելով, թե Հայաստանը, իբր, «դիտավորյալ աղտոտում է Արաքս գետը»։
Հիշեցնենք, որ օրերս Թուրքիայի 33 բնապահպանական և մարդու իրավունքների պաշտպանությամբ զբաղվող կազմակերպություններ Իգդիրում ակցիա էին անցկացրել Հայաստանի Մեծամորի ատոմակայանի շահագործման դեմ։
Ի դեպ, 2022 թվականի հոկտեմբերին ՄԱԳԱՏԷ-ի ղեկավար Ռաֆայել Գրոսսին անձամբ էր այցելել Մեծամորի ատոմակայան ու բարձր գնահատել կայանի աշխատանքը։
«Հայաստանի տնտեսությունը հենված է Մեծամորի ատոմային էլեկտրակայանի վրա, և Ատոմային էներգիայի միջազգային գործակալությունը շարունակելու է իր աջակցությունն առաջարկել՝ օգնելու ատոմակայանին ցածր ածխածնային էներգիան մատակարարել ապահով և անվտանգ կերպով։ Ուրախ եմ տեսնել Մեծամորում արված անվտանգային բարեփոխումները, տպավորված եմ նվիրված անձնակազմի հանձնառությամբ»,- գրել էր Գրոսսին X-ի իր միկրոբլոգում։
Թարգմանությունը՝ Էմմա Չոբանյանի
