Թուրքական Տրապիզոնում ջրհեղեղից հետո անհետ կորած անձի որոնումները շարունակվում են․ ԼՈՒՍԱՆԿԱՐՆԵՐ

Թուրքիայի Տրապիզոն քաղաքում տեղացած առատ անձրևները, որոնք ջրհեղեղ էին առաջացրել, բացասական հետևանքներ են գրանցել, հատկապեսմ Օրթահիսար և Ակչաաբաթ շրջաններում, գրում են թուրքական լրատվամիջոցները։

Մինչ ջրհեղեղից առավել տուժած տարածքներում շարունակվում են մաքրման և տարհանման աշխատանքները, բարձրադիր վայրերում սողանքներ են տեղի ունեցել։ Տրապիզոնի քաղաքապետ Ահմեդ Մեթին Գենչը հայտարարել է, որ  ջրհեղեղի հետևանքները վերացնելու համար տեղում աշխատում է 548 մարդ և 165 միավոր տեխնիկա։

Աքչաաբաթ շրջանում նախօրեի հեղեղներից հետո անհետ կորած 72-ամյա Հուսեյն Այդընին գտնելու աշխատանքները շարունակվում են։ Նշվում է, որ AFAD-ի և այլ հատուկ ծառայությունների, Առափնյա պահպանության ծառայության և ոչ կառավարական կազմակերպությունների որոնողական-փրկարարական ստորաբաժանումներից բաղկացած թիմերը շարունակում են աշխատանքները։

Հաղորդվում է, որ ջրհեղեղի պատճառով որոշ փողոցներ և պողոտաներ լցվել են ջրով։ Մինչ փողոցներում անձրևի տակ մնացած որոշ քաղաքացիներ փորձել են պաշտպանվել անձրևանոցներով, մյուսներն ապաստան էին գտել իրենց աշխատավայրերում։

Ճանապարհներին ջրի կուտակման պատճառով երթևեկությունը պարբերաբար խաթարվել է։ Հորդառատ անձրևի պատճառով որոշ մեքենաներ մնացել են ճանապարհին, իսկ տներն ու աշխատավայրերը հեղեղվել են։ Տրապիզոնի քաղաքապետարանի խմելու ջրի և կոյուղու գլխավոր տնօրինությունը (TİSKİ), հրշեջ ծառայությունը և AFAD-ի թիմերը շարունակում են աշխատել այն շրջաններում, որտեղ հեղեղումներ և քարաթափումներ են տեղի ունեցել։

Որոշ թաղամասերում սողանքների պատճառով վնասվել են ճանապարհներ և գյուղատնտեսական հողեր: Վնասված տրանսպորտային միջոցների վնասի գնահատման աշխատանքները շարունակվում են: Խմբերը՝ շինարարական տեխնիկայի ուղեկցությամբ, շարունակում են մաքրման և վերանորոգման աշխատանքները, հատկապես ափամերձ տարածքում տեղացած հեղեղից հետո, և փորձում են վերացնել ջրհեղեղի հետևանքները։

Թարգմանությունը՝ Էմմա Չոբանյանի