Քաղաքականություն
04.06.2025 | 11:02
ՌԴ բանակը հունիսի լույս 4-ի գիշերը անօդաչու թռչող սարքերով և հրթիռներով հարվածել է ուկրաինական Խարկովին։ Քաղաքում լայնածավալ հրդեհներ են բռնկվել, տուժած կա, հայտնում են տեղական իշխանությունները։ Խարկովի քաղաքապետ Իգոր Տերեխովը գրել է, որ ռուս զինվորականները քաղաքին հարվածելու համար օգտագործել են ինը «Շահեդ» և երկու հրթիռ, որոնց տեսակը պարզվում է։
«Արդյունաբերական գոտում հրդեհներ են բռնկվել չորս վայրում, այրվել է նաև մասնավոր տուն։ Այս պահի դրությամբ՝ Նովոբավարսկի շրջանում հայտնի է մեկ տուժածի մասին»,- նշել է քաղաքապետը։
Մարզային ռազմական վարչակազմի ղեկավար Օլեգ Սինեգուբովն էլ հայտնել է, որ որ հրթիռային հարվածների հետևանքով քաղաքացիական ձեռնարկության տարածքում հրդեհ է բռնկվել, այնտեղ վնասվել է միահարկ արդյունաբերական շենք, 30-ամյա տղամարդ է վիրավորվել։
Ռուս զինվորականները հարվածային անօդաչու թռչող սարքերի միջոցով գրոհել են նաև Օդեսան, հայտարարել է տարածաշրջանային ռազմական վարչակազմի ղեկավար Օլեգ Կիպերը։ Նրա խոսքով՝ ՀՕՊ ուժերը խոցել են թիրախների մեծ մասը, սակայն քաղաքի քաղաքացիական ենթակառուցվածքներին, այդ թվում՝ բնակելի շենքերին և սպասարկման կայաններին վնաս է հասցվել։ Մեկ մարդ վիրավորվել է։
Օդեսայի մարզային դատախազությունն իր հերթին հայտարարել է, որ հարձակման ժամանակ օգտագործվել է ավելի քան 20 անօդաչու թռչող սարք։
«Վնասվել և ավերվել են քաղաքացիական ենթակառուցվածքների օբյեկտներ, բնակելի շենքեր, ավտոտնակներ և մասնավոր ձեռնարկությունների պահեստներ»,- ասվում է մամուլի հաղորդագրության մեջ։
Գիշերը Ռուսաստանը նաև հարվածել է Սումիի մարզում գտնվող կենսաէթանոլի գործարանին, տուժածներ չկան։ Այս մասին առավոտյան հայտնել է տարածաշրջանային ռազմական վարչությունը։ Հաղորդագրության համաձայն՝ գործարանին հարվածել է 12 անօդաչու թռչող սարք։
Ռուսական կողմը հարվածները դեռևս չի մեկնաբանել։
Թարգմանությունը՝ Էմմա Չոբանյանի
