ՌԴ իրավազորության ճանաչում բռնակցված 5 շրջանների նկատմամբ, ՆԱՏՕ-ին Կիևի անդամակցության բացառում․ հրապարակվել է «ուկրաինական կարգավորման» մասին ՌԴ-ի հուշագիր-վերջնագիրը

Ռուսական պետական «ՌԻԱ Նովոստի», «ՏԱՍՍ» և «Ինտերֆաքս» գործակալությունները հրապարակել են Ռուսաստանի հուշագրի ամբողջական տեքստը՝ Ուկրաինայի հետ պատերազմը դադարեցնելու պայմաններով։ Ռուսական պատվիրակությունն այս փաստաթուղթը հանձնել է Ուկրաինայի ներկայացուցիչներին հունիսի 2-ին Ստամբուլում տեղի ունեցած բանակցությունների երկրորդ փուլի ժամանակ։ Հուշագիրը ներառում է երեք բաժին՝ հրադադարի պայմանների երկու տարբերակով, փոխանցում է Meduza-ն՝ ներկայացնելով դրա տեքստը։

Ռուսաստանի Դաշնության առաջարկները (հուշագիր) ուկրաինական ճգնաժամի կարգավորման վերաբերյալ

Բաժին I – Վերջնական կարգավորման հիմնական չափորոշիչները

1․Ղրիմի, ԼԺՀ-ի, ԴԺՀ-ի, Զապորոժիեի և Խերսոնի մարզերի՝ ՌԴ կազմում ընդգրկման միջազգային իրավական ճանաչում, Ուկրաինայի զինված ուժերի ստորաբաժանումների և Ուկրաինայի այլ կիսառազմական կազմավորումների լիակատար դուրսբերում դրանց տարածքներից;

2․ Ուկրաինայի չեզոքություն, որը ենթադրում է նրա հրաժարումը ռազմական դաշինքներին և կոալիցիաներին միանալուց, ինչպես նաև 3-րդ պետությունների կողմից Ուկրաինայի տարածքում ցանկացած ռազմական գործունեության և այնտեղ օտարերկրյա զինված կազմավորումների, ռազմական բազաների և ռազմական ենթակառուցվածքների տեղակայման արգելք։

3․ Այս բաժնի 2-րդ կետի դրույթներին անհամատեղելի միջազգային պայմանագրերի և համաձայնագրերի դադարեցում և ապագայում դրանց կնքումից հրաժարում։

4․ Ուկրաինայի՝ որպես միջուկային կամ զանգվածային ոչնչացման այլ զենք չունեցող պետության կարգավիճակի հաստատում՝ դրանց ընդունման, տարանցման և Ուկրաինայի տարածքում տեղակայման ուղղակի արգելքի սահմանմամբ։

5․ Ուկրաինայի զինված ուժերի և այլ ռազմական կազմավորումների առավելագույն թվաքանակի, զենքի և ռազմական տեխնիկայի առավելագույն թվաքանակի և դրանց թույլատրելի բնութագրերի սահմանում, զինված ուժերի և Ազգային գվարդիայի կազմում ուկրաինական ազգայնական կազմավորումների լուծարում։

6․ Ռուս և ռուսախոս բնակչության լիարժեք իրավունքների, ազատությունների և շահերի ապահովում, ռուսերեն լեզվին պաշտոնական լեզվի կարգավիճակի տրամադրում։

7․ Նացիզմի և նեոնացիզմի փառաբանման և քարոզչության օրենսդրական արգելք, ազգայնական կազմակերպությունների և կուսակցությունների լուծարում։

8․ ՌԴ-ի և Ուկրաինայի միջև գործող բոլոր տնտեսական պատժամիջոցների, արգելքների և սահմանափակող միջոցառումների վերացում և նորերի կիրառումից հրաժարում։

9․ Ընտանիքների վերամիավորման և տեղահանված անձանց հետ կապված մի շարք հարցերի լուծում։

10․ Ռազմական գործողությունների հետևանքով պատճառված վնասի հետ կապված փոխադարձ պահանջներից հրաժարում։

11․ Ուկրաինական ուղղափառ եկեղեցու նկատմամբ սահմափակումների վերացում։

12․ Դիվանագիտական ​​և տնտեսական հարաբերությունների (ներառյալ՝ գազի տարանցումը), տրանսպորտի և այլ հաղորդակցությունների աստիճանական վերականգնում, այդ թվում՝ երրորդ երկրների հետ։

Բաժին II – Հրադադարի  պայմաններ

Տարբերակ 1. Ուկրաինայի զինված ուժերի և այլ կիսառազմական կազմավորումների լիարժեք դուրսբերում ՌԴ տարածքից, ներառյալ՝ ԴԺՀ, ԼԺՀ, Զապորոժիեի և Խերսոնի մարզերը, դրանց դուրսբերում ՌԴ սահմաններից կողմերի կողմից համաձայնեցված հեռավորության վրա՝ համաձայն հաստատված կանոնակարգի։

Տարբերակ 2. «Փաթեթային առաջարկ».

1․Ուկրաինայի  ԶՈւ-ի և այլ կիսառազմական կազմավորումների վերաբաշխման արգելք, բացառությամբ՝ ՌԴ-ի սահմաններից կողմերի կողմից համաձայնեցված հեռավորության վրա հետ քաշվելու նպատակով տեղաշարժերի։

2․ Մոբլիզացիայի դադարեցում և դեմոբիլիզացիայի սկիզբ։

3․ Ռազմական արտադրանքի և Ուկրաինային օտարերկրյա ռազմական օգնության արտասահմանյան մատակարարումների դադարեցում, ներառյալ՝ արբանյակային կապի ծառայությունների մատուցումը և հետախուզական տվյալների տրամադրումը։

4․ Ուկրաինայի տարածքում երրորդ երկրների ռազմական ներկայության բացառում, Ուկրաինայի կողմից ռազմական գործողություններին օտարերկրյա մասնագետների մասնակցության դադարեցում։

5․ Ուկրաինայի կողմից ՌԴ-ի և նրա քաղաքացիների դեմ դիվերսիաներից ու դիվերսիոն գործողություններից հրաժարվելու երաշխիք։

6․ Երկկողմանի հրադադարի մոնիթորինգի և վերահսկման կենտրոնի ստեղծում։

7․ «Քաղաքական բանտարկյալների» փոխադարձ համաներում և պահվող քաղաքացիական անձանց ազատ արձակում։

8․ Ուկրաինայում ռազմական դրության վերացում։

9․ Ուկրաինայի նախագահի և Գերագույն ռադայի ընտրությունների ամսաթվի հայտարարում, որը պետք է տեղի ունենա ռազմական դրության վերացումից հետո ոչ ուշ, քան 100 օրվա ընթացքում։

10․ I բաժնում պարունակվող դրույթների իրականացման վերաբերյալ համաձայնագրի ստորագրումը։

Բաժին III – Քայլերի հաջորդականությունը և դրանց իրականացման ժամկետները

1․ Պայմանագրի տեքստի վրա աշխատանքի սկիզբը։

2․ «Գորշ գոտում» զոհվածների մարմինները հավաքելու համար 2-3-օրյա զինադադարի հայտարարում։

3․ Ուկրաինայի զինված ուժերի 6000 զինծառայողների մարմինների միակողմանի փոխանցում։

4․ Հրադադարի մասին հուշագրի ստորագրում՝ բոլոր դրույթների իրականացման կոնկրետ ամսաթվերով և վերջնական կարգավորման մասին ապագա պայմանագրի (այսուհետ՝ Պայմանագիր) ստորագրման ամսաթվի որոշմամբ։

5․ Ուկրաինայի ԶՈՒ-ի դուրսբերման սկզբի պահից սահմանվում է 30-օրյա հրադադարի ռեժիմ։ Միաժամանակ, այդ 30 օրվա ընթացքում պետք է իրականացվի Ուկրաինայի զինված ուժերի ստորաբաժանումների լիակատար դուրսբերումը Ռուսաստանի Դաշնության տարածքից և «փաթեթային համաձայնագրի» լիարժեք իրականացումը։

6․ Ընտրությունների անցկացում, Ուկրաինայի տարածքում պետական ​​մարմինների ձևավորում;

7․ Պայմանագրի ստորագրում;

8․ Ստորագրված պայմանագրի հաստատում ՄԱԿ-ի Անվտանգության խորհրդի իրավաբանորեն պարտադիր բանաձևով;

9․ Պայմանագրի վավերացումը, ուժի մեջ մտնելը և իրագործումը։

Հավելենք, որ Ստամբուլում կայացած հանդիպումից հետո հրավիրված մամուլի ասուլիսում ՌԴ նախագահի խորհրդական, ռուսական պատվիրակության ղեկավար Վլադիմիր Մեդինսկին  հայտարարել էր, որ Ուկրաինայի հետ բանակցությունների ընթացքում Ռուսաստանն առաջարկել է ռազմաճակատի որոշակի հատվածներում երկու-երեք օրով հրադադար հաստատել զոհվածների մարմինները հավաքելու համար։

Ուկրաինայի պատվիրակության ղեկավար, պաշտպանության նախարար Ռուստեմ Ումերովն էլ հայտարարել էր, որ Ստամբուլում կայացած բանակցություններում Ռուսաստանը և Ուկրաինան համաձայնության են եկել փոխանակել ծանր հիվանդ և ծանր վիրավորված ռազմագերիներին, ինչպես նաև 18-ից 25 տարեկան գերիներին, «6000-ը 6000-ի դիմաց» ձևաչափով զոհերի մարմինները։

Թարգմանությունը՝ Էմմա Չոբանյանի