07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
ՌԴ մի շարք շրջանների իշխանություններ հայտնել են ԱԹՍ-ների գրոհների մասին․ ՊՆ-ն հաղորդել է 162 ԱԹՍ խոցելու մասին․ ՏԵՍԱՆՅՈՒԹ
Քաղաքականություն
02.06.2025 | 12:45
Ռուսաստանի մի քանի շրջանների իշխանությունները հայտնել են անօդաչու թռչող սարքերի գրոհների մասին: ՌԴ Պաշտպանության նախարարությունն էլ հայտնել է հունիսի լույս 2-ի գիշերը խոցված 162 անօդաչու թռչող սարքի մասին, գրում է Current time-ը։
Ռուսաստանի ռազմական գերատեսչության տվյալներով՝ ուկրաինական անօդաչու թռչող սարքերը հարձակվել են առնվազն ութ շրջանի, ինչպես նաև բռնակցված Ղրիմի վրա։ Անօդաչու թռչող սարքերի մեծ մասը խփվել է Կուրսկի (57), Բելգորոդի (31) և Լիպեցկի (27) մարզերում։ ՊՆ-ի հաղորդմամբ՝ հարձակման են ենթարկվել նաև Վորոնեժի, Բրյանսկի, Ռյազանի, Օրյոլի և Տամբովի մարզերը։
Լիպեցկի մարզում, ըստ նահանգապետ Իգոր Արտամոնոի, Լեբեդյանսկի շրջանում տեղի ունեցած հարձակման հետևանքով մեկ մարդ թեթև վիրավորում է ստացել։ Անօդաչու թռչող սարքի բեկորներն ընկել են երկու տան վրա:
Կուրսկի մարզում, ըստ նահանգապետի պաշտոնակատար Ալեքսանդր Խինշտեյնի, հարվածներ են հասցվել բազմաբնակարան շենքին, վնասվել են նաև երեք մասնավոր տուն և մեկ ավտոտնակ։ Վիրավորներ չկան։
Վորոնեժի մարզում էլեկտրահաղորդման գծի վրա անօդաչու թռչող սարքի ընկնելու հետևանքով M-4 «Դոն» մայրուղու վրա բարձրավոլտ լար է պոկվել։ Ռոստով տանող ճանապարհի հատվածը փակվել է։
Տեղացիները սոցցանցերում գրել են, որ Բորիսոգլեբսկում ռազմական օդանավակայանի վրա հարձակում է տեղի ունեցել։ Այս մասին էլ հաղորդում է Astra տելեգրամ ալիքը: Քաղաքում կա նաև ինքնաթիռների վերանորոգման գործարան, որն արդեն հարձակման է ենթարկվել այս տարվա հունվարին: Վնասվել են արտադրամասերից մեկի տանիքը և կաթսայատունը:
Թարգմանությունը՝ Էմմա Չոբանյանի
