Տնտեսություն
29.05.2025 | 11:13ԱԺ նիստում Մրցակցային պաշտպանության հանձնաժողովի տարեկան զեկույցի քննարկման ժամանակ իր ելույթում ՔՊ պատգամավոր Սերգեյ Բագրատյանը խոսեց կոնյակի արտահանման խնդիրներից։ Ըստ նրա՝ խնդիրները, որոնք առաջացել են Վրաստանում ավելի շատ ներքին մրցակցության խնդիրներ են, որոնք մեր երկրում խաթարվել են։
«Մրցակցության խաթարումը տեղի է ունեցել Հայաստանում, հետո՝ տեղափոխվել Վրաստան։ Արտադրողներն ամիսներով չեն կարողանում կոնյակ ու գինի ԵՏՄ և Բալթյան երկրներ տեղափոխել, Վրաստանն իր տարածքում ստուգումներ է անում։ Այսինքն՝ ձևավորվել են որոշակի կլաններ, որոնք իրենց աշխատանքն այնպես են կազմակերպում, որ որոշակի շահ ունենան։ Եվ այն ընկերությունները, որոնք ՀՀ-ից կարողանում են պայմաավորվել այդ մաֆիոզ խմբավորումների հետ, կարողանում են գինի և կոնյակ արտահանել, իսկ բարեխիղճ գինեգործներն ու կոնյակագործները մնում են սահմանին կանգնած։ Եթե կարծում եք, որ սա միայն Վրաաստանի հարցն է, սխալվում ենք։ Մենք պետք է մրցակցությունը պաշտպանենք»,- նկատեց պատգամավորը։
Հիշեցնենք, որ Հայաստանից ալկոհոլային խմիչք արտահանողներն ու արտադրողները բողոքի ակցիաներ են իրականացնում՝ պահանջելով կարգավորել արտահանումների հարցը։ Նրանք բողոքում են, որ ՌԴ կամ մերձբալթյան երկրներ արտահանվող իրենց ալկոհոլային խմիչքները, հիմնականում՝ կոնյակը, տարանցիկ երկրում՝ Վրաստանում ստուգումների է ենթարկվում, ինչի հետևանքով ապրանքը ամիսներով մնում է սահմանին։
Մանրամասները՝ տեսանյութում։
