ՄԻՊ-ը Սերբիայի գենդերային հավասարության պետնախարարի հետ քննարկել է իրավահավասարության ապահովման և փորձի փոխանակման հարցեր

Մարդու իրավունքների պաշտպան Անահիտ Մանասյանը մայիսի 26-ին ընդունել է Սերբիայի Հանրապետության գենդերային հավասարության, կանանց նկատմամբ բռնության կանխարգելման, կանանց տնտեսական և քաղաքական հզորացման հարցերով պետնախարար Տատյանա Մացուրային։ Հյուրին ուղեկցել է Հայաստանում Սերբիայի արտակարգ և լիազոր դեսպան Տատյանա Պանայոտովիչ-Ցվետկովիչը:

ՀՀ մարդու իրավունքների պաշտպանի աշխատակազմը տեղեկացնում է, որ հանդիպման ընթացքում Անահիտ Մանասյանը ներկայացրել է մարդու իրավունքների պաշտպանի մանդատը և հաստատության գործունեության հիմնական ուղղությունները՝ ընդգծելով, որ մարդու իրավունքների պաշտպանությունը պետք է զուգակցվի դրանց խթանմանն ուղղված համակարգային և հետևողական քայլերով։

Պաշտպանը նշել է, որ իր աշխատանքի ուղղությունները բավական ընդգրկուն են, ի թիվս այլնի, ներառելով կանանց, երեխաների, ազգային փոքրամասնությունների, ինչպես նաև հաշմանդամություն ունեցող անձանց իրավունքների պաշտպանությունն ու խթանումը։ Հատուկ ուշադրություն է դարձվել կանանց իրավունքների պաշտպանության և ընտանեկան բռնության կանխարգելման հարցերին։

Ըստ աղբյուրի՝ Անահիտ Մանասյանն ընդգծել է, որ բռնության դեմ պայքարը պահանջում է ոչ միայն իրավական հստակություն, այլև քաղաքական կամք, հանրային գիտակցության բարձրացում և ոլորտային համակարգված մոտեցում։ Այս համատեքստում նա կարևորել է մեր երկրում ընտանեկան բռնության մասին օրենքի ընդունումը՝ նշելով, որ այն էական ազդեցություն է ունեցել նման դեպքերի բացահայտման, կանխարգելման և բռնության զոհերի պաշտպանվածության մակարդակի բարձրացման գործում։

Անդրադառնալով ատելության և խտրականության դրսևորումներին՝ Պաշտպանը խիստ մտահոգիչ է համարել առցանց տիրույթում և մեդիադաշտում խտրական և ատելության խոսքի տարածման աճը, այդ թվում՝ քաղաքական և հանրային գործիչների կողմից արվող հայտարարություններում։ Նա նշել է, որ այս երևույթները լրջորեն խաթարում են հանդուրժողականության և իրավահավասարության սկզբունքները։

Նշվում է, որ քննարկման առանցքային թեմաներից էր նաև իրավահավասարության ապահովման և հակախտրականության ոլորտում առկա մարտահրավերների հաղթահարման անհրաժեշտությունը։ Այս համատեքստում Անահիտ Մանասյանը կարևորել է «Իրավահավասարության ապահովման և խտրականությունից պաշտպանության մասին» օրենքի ընդունումը։

«Թեև տարիների ընթացքում այս ոլորտում արձանագրվել են մի շարք դրական զարգացումներ, այնուամենայնիվ առկա են խնդիրներ, որոնք պետք է հաղթահարվեն համապարփակ օրենսդրական բարեփոխումների և նպատակային պետական քաղաքականության միջոցով։ Այդ համատեքստում օրենքի ընդունումը կդառնա առանցքային քայլ՝ ուղղված հավասարության երաշխավորմանը»,- ասել է Պաշտպանը։

Կողմերը քննարկել են նաև փորձի փոխանակման և ոլորտային համագործակցության հնարավորությունները՝ ուղղված քննարկված ոլորտներում առկա խնդիրների առավել արդյունավետ հաղթահարմանը։