18.02.2026 | 12:52
Զելենսկին պատժամիջոցներ է սահմանել Լուկաշենկոյի նկատմամբ
Ալիևի օգնականը Բրյուսելում հանդիպումներ է անցկացրել․ քննարկվել է ՀՀ-Ադրբեջան կարգավորման գործընթացը
Քաղաքականություն
23.05.2025 | 11:16
Ադրբեջանի նախագահի օգնական, աշխատակազմի արտաքին քաղաքականության բաժնի ղեկավար Հիքմեթ Հաջիևը Բրյուսելում մի շարք հանդիպումներ է անցկացրել, այդ թվում՝ Արտաքին գործողությունների ծառայության գլխավոր քարտուղար Բելեն Մարտինես Կարբոնելի հետ:
«Մենք քննարկել ենք ԵՄ-Ադրբեջան հարաբերությունները, ԵՄ-ի աջակցությունը Հայաստան-Ադրբեջան կարգավորման գործընթացին և տարածաշրջանային զարգացումները։ ԵՄ-ն հանձնառու է մնում տարածաշրջանում խաղաղությանը և առաջընթացին»,- գրել է Կարբոնելը X-ի իր միկրոբլոգում։
ՆԱՏՕ-ի կենտրոնակայան կատարած այցի շրջանակում Հաջիևը հանդիպել է նաև ՆԱՏՕ-ի գլխավոր քարտուղարի տեղակալ Ռադմիլա Շեկերինսկայի հետ։ Ադրբեջանական կողմի փոխանցմամբ՝ հանդիպման ընթացքում կողմերը քննարկել են Ադրբեջանի և ՆԱՏՕ-ի միջև գործընկերության ներկա վիճակը և հեռանկարները, մասնավորապես, տարածաշրջանային և միջազգային անվտանգությանը վերաբերող հարցեր։ Նշվել է ՆԱՏՕ-ի ներդրումը խաղաղապահ գործողություններում, դաշնակից և գործընկեր պետությունների էներգետիկ անվտանգության ապահովումը, ինչպես նաև Ադրբեջանի դերը՝ որպես դաշինքի գործընկեր։
«Մենք քննարկել ենք ՆԱՏՕ-ի և Ադրբեջանի միջև համագործակցությունը, ինչպես նաև տարածաշրջանային անվտանգության հարցերը։ ՆԱՏՕ-ն կարևորում է իր գործընկերությունը Ադրբեջանի հետ։ Հարավային Կովկասը Դաշինքի համար առանցքային նշանակություն ունեցող տարածաշրջան է»,- գրել է Շեկերինսկան X-ում։
Հաղորդվում է, որ տեղի է ունեցել ԵՄ-ի և Ադրբեջանի միջև անվտանգության երկխոսության 6-րդ փուլը։ Բելգիայում և Լյուքսեմբուրգում Ադրբեջանի դեսպան, ԵՄ-ում Ադրբեջանի առաքելության ղեկավար Վագիֆ Սադիգովը հայտնել է, որ նիստը համանախագահել են Հիքմեթ Հաջիևը և ԵՄ արտաքին գործողությունների ծառայության գլխավոր քարտուղարի տեղակալ Օլաֆ Սկուգը։
«Տեղի են ունեցել բովանդակալից և բաց քննարկումներ քաղաքականության և անվտանգության ոլորտում առկա հարաբերությունների և համագործակցության հեռանկարների վերաբերյալ։ Այս երկխոսությունը հաջորդում է վերջին ամիսներին Մալթայում, Բաքվում, Բրյուսելում, Տիրանայում կայացած ԵՄ-Ադրբեջան կարևոր բարձր մակարդակի մի շարք հանդիպումների։ Այսօր ևս կարևոր քննարկումներ տեղի ունեցան ԵՄ այլ բարձրաստիճան պաշտոնյաների և մի շարք անդամ պետությունների ներկայացուցիչների հետ, այդ թվում՝ ընդունող երկիր Բելգիայի»,- նշել է Ադրբեջանի դեսպանը։
Թարգմանությունը՝ Էմմա Չոբանյանի
