ԵՐԵՎԱՆԻ ԺԱՄԱՆԱԿՈՎ. Այո՛, Նիկոլ Փաշինյանը ժողովրդի դիկտատուրա է հաստատել երկրում․ Էդուարդ Զորիկյան. ՏԵՍԱՆՅՈՒԹ

«Հանրապետականները նման են շախմատի այն ֆիգուրներին, որոնք շարունակում են խաղալ շախմատիստի՝ պարտիան լքելուց հետո։ Դա զավեշտալի է։ Ամեն դեպքում, ոմանք արդեն հասկացան, որ մերժվածի պոչը բռնելով՝ բոլորով են խորտակվելու»,-Factor.am-ի «Երևանի ժամանակով» զրուցաշարի շրջանակում տեսակետ է հայտնում երգահան, երգիչ էդուարդ Զորիկյանը՝ անդրադառնալով հանրապետականների կողմից կուսակցությունը լքելու և ՀՀ վարչապետ Նիկոլ Փաշինյանին սատարելու միտումին։

Պարոն Զորիկյանի համար պակաս զավեշտալի չէ նաև Նիկոլ Փաշինյանի և Գագիկ Ծառուկյանի կողմից հուշագրի ստորագրման պրոցեսը․«Այն, ինչ տեսանք, նորություն կամ անակնկալ չէր։ Կան ուժեր, որոնք ասում են՝ մածունը սև է, կամ՝ սպիտակ է, կան նաև ուժեր, որոնք ասում են․«Ի՞նչ գույն եք ուզում, որ մածունը լինի»։

Երգահանը հակահեղափոխականներին խորհուրդ է տալիս չակտիվանալ, քանի որ իրենք «էն գլխից» պարտված են․ «Եթե նույնիսկ հակահեղափոխականները փորձեն միավորվել, կխորտակվեն․ ու՞մ դեմ են միավորվելու, ժողովրդի՞։ Եթե պետք լինի, Հանրապետության հրապարակում 10 միլիոն մարդ էլ կհավաքվի․ սա համահայկական հեղափոխություն է։ Հեղափոխությունը կայացած փաստ է, իսկ եթե կան մարդիկ, որոնք կույր են ձևանում, իրենց հոգեվարքն է երկարելու»,- ասում է նա։

Հակադարձելով հանրապետականների այն պնդմանը, թե Փաշինյանն իրեն դիկտատորի պես է պահում, պարոն Զորիկյանը շեշտում է․ «Այո՛, Նիկոլ Փաշինյանը ժողովրդի դիկտատուրա է հաստատել երկրում։ Այսօր ժողովուրդն է թելադրողը, և փառք Աստծո, որ ունենք այնպիսի առաջնորդ, որը հետևում է նրան քայլ առ քայլ»։

Մանրամասները՝ տեսանյութում։

Աննա Բաբաջանյան