22.04.2026 | 23:30
ՀՀ տարածքում ավտոճանապարհները հիմնականում անցանելի են
Տիգրան Տեր-Մարգարյանն իր աշխատասենյակում է, այս պահին հրաժարական չի ներկայացրել․ խոսնակ
Քաղաքականություն
15.05.2025 | 11:27
«Քանի որ բազմաթիվ զանգեր ենք ստանում Նոր Նորք վարչական շրջանի ղեկավարի հնարավոր հրաժարականի վերաբերյալ, տեղեկացնում եմ, որ նման զարգացման դեպքում կտրվի պաշտոնական մեկնաբանություն»,- գրել է Երևանի քաղաքապետի մամուլի քարտուղար Հայկ Կոստանյանը՝ արձագանքելով Նոր Նորքի թաղապետ Տիգրան Տեր-Մարգարյանի հրաժարականի մասին տարածվող լուրերին։
Նշենք, որ Նոր Նորք վարչական շրջանի ղեկավար Տիգրան Տեր-Մարգարյանի հրաժարականի մասին գրել է Armlur.am-ը։
Թաղապետարանի հասարակայնության հետ կապերի պատասխանատու Գևորգ Հովհաննիսյանը Factor TV-ին հայտնեց, որ թաղապետն այժմ իր աշխատասենյակում է և այս պահին հրաժարականի դիմում չի գրել։ Ստացվում է՝ թե՛ Երևանի քաղաքապետարանից, թե՛ Նոր Նորքի թաղապետարանից ո՛չ հերքում, ո՛չ հաստատում են հրաժարականի մասին լուրը։
Երևանի ավագանու «Հանրապետություն» խմբակցությունից Հայկ Սահակյանն էլ Factor TV-ի հետ զրույցում ասաց, որ նման տեղեկություն չունի, ճշտելուց հետո կհայտնի։
Ի դեպ, ուշագրավն այն է, որ երեկ Տիգրան Տեր-Մարգարյանն աշխատակազմին է ներկայացրել վարչական շրջանի ղեկավարի նոր տեղակալ Մարատ Սևոյանին։ Վերջինը նշանակվել է Արթուր Գույումջյանի փոխարեն։
Հիշեցնենք՝ ապրիլի 30-ին Տեր-Մարգարյանի մասնակցությամբ Նոր Նորքի թաղապետարանում ծեծկռտուք էր տեղի ունեցել։ Մի խումբ անձանց կողմից ֆիզիկական ներգործության հատկանիշներով նախաձեռնված քրեական վարույթով նա և թաղապետարանի 3 աշխատակից մեղադրյալի կարգավիճակ ունեն:
Արփի Հակոբյան
