24.05.2026 | 14:33
Ամենաուշը 2 տարուց մենք կունենանք Հայաստան-Եվրամիություն վիզաների ազատականացված վիճակ․ Նիկոլ Փաշինյան
Համապատասխան քայլեր կձեռնարկվեն. ՀՖՖ-ն անդրադարձել է գավաթի եզրափակիչ խաղից հետո տեղի ունեցած միջադեպին
Հասարակություն
14.05.2025 | 18:40
Հայաստանի ֆուտբոլի ֆեդերացիան արձագանքել է Հայաստանի ֆուտբոլի գավաթի խաղարկության եզրափակիչ խաղից հետո տեղի ունեցած միջադեպին:
«Արմենպրես»-ի հարցմանն ի պատասխան՝ ՀՖՖ հաղորդակցության բաժինը մասնավորապես նշել է.
«Հայաստանի Գավաթի՝ 2025թ. մայիսի 13-ին կայացած եզրափակիչ խաղի ընթացքում արձանագրվել է անթույլատրելի միջադեպ։ Մասնավորապես, անվտանգության ապահովման համար ՀՖՖ-ին պահնորդական ծառայություն մատուցող անձանցից մեկը անհամաչափ ուժ է կիրառել անչափահաս երեխայի նկատմամբ, որը խաղի ավարտին մտել էր խաղադաշտ։ Հայաստանի ֆուտբոլի ֆեդերացիան խիստ դատապարտում է նման վարքագիծը և այն համարում անընդունելի. որևէ մեկի կողմից անհամաչափ ուժի կիրառումը խաղի կամ տոնական միջոցառման ընթացքում հակասում է ՀՖՖ կողմից որդեգրված կանոններին և արժեհամակարգին։ ՀՖՖ-ն վերահաստատում է իր հանձնառությունը՝ երաշխավորելու բոլոր խաղերին անվտանգ և մարդասիրական միջավայր, հատկապես՝ մեր երիտասարդ երկրպագուների համար։ Մենք մեր խորին ափսոսանքն ենք հայտնում տեղի ունեցած միջադեպի համար, և վստահեցնում ենք, որ համապատասխան քայլեր կձեռնարկվեն՝ նման դեպքերի կրկնությունը բացառելու նպատակով»:
Առաջին հայկական ճակատ երկրպագուական շարժումը հայտարարություն և տեսանյութ էր տարածել՝ պնդելով, որ Հայաստանի ֆուտբոլի գավաթի խաղարկության «Նոա»-«Արարատ-Արմենիա» խաղի ավարտից հետո դաշտ մտած անչափահաս երկրպագուի նկատմամբ բռնություն է կիրառել ՀՖՖ-ի անվտանգության պետը։
Դեպքին անդրադարձել է նաև ՀՀ ներքին գործերի նախարարությունը։
«Արմենպրես»-ի հետ զրույցում ՀՀ ՆԳՆ մամուլի խոսնակ Նարեկ Սարգսյանը հայտնել է, որ ՆԳՆ-ն կազմված փաստաթղթերն ուղարկել է ՀՀ քննչական կոմիտե։
