Մտածում էի` չենք փրկվի. մանրամասներ թիթեղի հարվածից տուժած հղի կնոջ դեպքից․ ՏԵՍԱՆՅՈՒԹ

«Ես ուղղակի մտածում էր, որ չենք փրկվի, որովհետև բավականին մեծ վնասված էին ստացել»,- այսօր լրագրողների հետ զրույցում պատմեց 23-ամյա հղի Ռուզաննա Հարությունյանը, որը որովայնի վնասվածքով, արյունահոսությամբ մայիսի 11-ին տեղափոխվել էր հիվանդանոց։

«Քամու ժամանակ դուրս եկա, որպեսզի երեխայիս տուն կանչեմ։ Բայց երեխային չհասա։ Քամին մեր տան տանիքից մի թիթեղ պոկեց, խփեց որովայնիս, սկսեց արյունահոսություն, ունեի մեծ պատռվածք։ Մեր հարևանը կարճ ժամանակահատվածում ինձ տեղափոխեց հիվանդանոց,  բժկուհիներ Նառա Սուրենովնան և Անահիտ Հովիկովնան շատ արագ կազմակերպեցին կեսարյան հատում, որի արդյունքում ծնվեց բալիկս։ Երեխան հիմա, փառք Աստծո, ողջ է»,- ասում է ծննդկանը։

Կեսարյան հատման արդյունքում ծնվել է 2450 գրամ քաշով 48 սմ հասակով աղջիկ` ճակատի ձախ շրջանում 5 սմ երկարությամբ խորը վնասվածքով: «Էրեբունի» ԲԿ ծննդատան տնօրեն Անդրանիկ Պողոսյանը լրագրողների հետ զրույցում հայտնեց, որ հիվանդանոց տեղափոխված կինն անմիջապես հետազոտվել է, 2-3 րոպե անց նախապատրաստել են վիրահատության։ 

«Հրաշք է, որ կինն ու նորածինը փրկվել են։ Հարվածն այնքան ուժեղ է եղել, որ նորածնի ձախ քունքի վերևի շրջանում բավականին խորը պատռվածք կա։ Նորածինը և մայրը լավ վիճակում են»,- ասաց Պողոսյանը։

Հիշեցնենք, որ մայիսի 11-ին՝ երեկոյան ժամը 17:10-ին, «Էրեբունի» ծննդատուն է տեղափոխվել 23-ամյա 36 շաբաթական հղի` որովայնի թափանցող վնասվածք-պատռվածքով, սուր ցավերով, արյունահոսությամբ:

Մանրամասները՝ տեսանյութում։

Անի Թամրազյան