Բաքվում ընթացող դատական նիստում իբր «Քարվաճառի օկուպացիան» պատկերող տեսանյութ է ցուցադրվել

Բաքվում ընթացող Արցախի ղեկավարների և մյուս պաշտոնյաների նկատմամբ հարուցված շինծու գործերով դատական նիստում  ներկայացվել է տեսանյութ, որն, իբր ,«ցույց է տալիս Քարվաճառի օկուպացիան Հայաստանի կողմից»։ Ըստ ադրբեջանական լրատվամիջոցների՝ տեսանյութը սկսվում է հայկական զինված ուժերի դիրքերի տեղակայման քննարկմամբ։ Կադրում երևում է, թե ինչպես է Մոնթե Մելքոնյանը մի քանի անգամ հարցնում հայ զինծառայողներին. «Ի՞նչ արեցինք այսօր», «Որտե՞ղ ենք հիմա», «Որտե՞ղ էինք երեկ և ի՞նչ արեցինք»։ Ի պատասխան՝ զինվորը հայտնում է, որ այդ պահին գտնվում են Քարվաճառից 20 կիլոմետր հեռավորության վրա։ Մոնթեն տեսանյութում ասում է, որ սկսել են շարժվել Մարտակերտի արևմտյան մասից, և այժմ հասել են Քարվաճառ։

«Քարվաճառի՝ Հայաստանին միացմամբ, ամբողջ Ղարաբաղը կմիանա, կբացվեն Հայաստան տանող բազմաթիվ ճանապարհներ։ Հուսով եմ, որ ազերիները կհասկանան և կընդունեն, որ ամեն ինչ ավարտված է», – տեսանյութում ասում է Մելքոնյանը։

Նա պատասխանելով այն հարցին, թե արդյոք ադրբեջանցիները լուրջ դիմադրություն են ցուցաբերել, ասում է, որ այնտեղ են հասել Լաչինի ճանապարհը փակելով։ «Յուրաքանչյուր հայ պետք է հասկանա, որ իր մասնակցությունը այս հարցում չափազանց կարևոր է։ Այս տարածքները, ինչպես որոշվել է 1988 թվականին, կմիացվեն Հայաստանին»,-նշել է Մոնթե Մելքոնյանը։

Ըստ ադրբեջանական լրատվամիջոցների՝ նա  նաև  պնդել է, որ մարտերի ընթացքում զոհվել է մոտ 70 ադրբեջանցի։

Բացի այդ ՝ նիստում ցուցմունք է տվել «տուժող» Զաբիլ Սաֆարովը, որն, իբր , պատանդ է վերցվել Քարվաճառի գործողության ժամանակ։ Նա իր ցուցմունքում նշել է, որ 1993 թվականի ապրիլի 4-ին հայկական զինված ուժերը մտել են Քարվաճառ և շրջապատել այն։ Սաֆարովը պատմել է, թե եղել է Շուշիի բանտում, տեսել, թե ինչպես են «հայերը ծեծում և սպանում  մի քանի ադրբեջանցու»։ Սաֆարովն հայտարարել է, թե, իբր, իրեն ևս խոշտանգել են, ինչի հետևանքով աջ ականջի լսողությունը և տեսողությունը վատացել են։

Դատական նիստը շարունակվում է։

Թարգմանությունը՝ Էմմա Չոբանյանի