29.04.2026 | 23:40
Հայաստան–ՄԱԿ համագործակցություն․ ուշադրության կենտրոնում՝ խոցելի խմբերի պաշտպանությունը
Ֆրանսիայում Ադրբեջանի դեսպանը չի հրավիրվել Փարիզում նախանշված Երկրորդ համաշխարհային պատերազմում հաղթանակի 80-ամյակի տոնակատարություններին
Քաղաքականություն
07.05.2025 | 19:49
Վաղը՝ մայիսի 8-ին, Փարիզում նախատեսվում են լայնածավալ տոնակատարություններ՝ Երկրորդ համաշխարհային պատերազմում Գերմանիայի նկատմամբ տարած հաղթանակի 80-ամյակի կապակցությամբ։ Ադրբեջանական իշխանամերձ Minval.az-ը տեղեկացել է, որ գրեթե բոլոր օտարերկրյա դիվանագետները հրավիրվել են միջոցառմանը՝ բացառությամբ Ադրբեջանի դեսպան Լեյլա Աբդուլլաևայի։
«Ակնհայտ է, որ Մակրոնի թիմը դիմում է էժանագին քաղաքական քայլերի՝ բոլոր առումներով, որոնք ցույց են տալիս ներկայիս իշխող թիմում որևէ բարոյական արժեքի և էթիկական չափորոշիչների բացակայությունը»,- գրում է լրատվամիջոցը՝ նշելով, իբր, «Գերմանիայի նկատմամբ տարած հաղթանակում Ֆրանսիայի Դիմադրության շարժմանը Ադրբեջանի քաղաքացիների մասնակցության մասին»։
Հավելենք, որ Ադրբեջանի կողմից հակաֆրանսիական պետական արշավի շրջանակում այդ երկրի իշխանությունների կողմից 2023 թվականի հուլիսի 6-ին ստեղծվել է Բաքվի նախաձեռնող խումբ, որը Փարիզի դեմ տարբեր միջոցառումներ է անցկացնում, դրանում ներգրավելով ֆրանսիական անդրծովյան տարածքների, ինչպես նաև Կորսիկայի և, մասնավորապես, Նոր Կալեդոնիայի ներկայացուցիչներին։ Այն կազմակերպել է մեկ տասնյակից ավելի միջազգային համաժողովներ, որոնցից մի քանիսը՝ ՄԱԿ-ի կենտրոնակայաններում՝ Նյու Յորքում, Ժնևում և Վիեննայում, Ստամբուլում, Բաքվում։
Ադրբեջանը նաև ֆինանսավորում է Ֆրանսիայի և Կորսիկայի անդրծովյան տարածքների տարբեր ներկայացուցիչներին։ Ֆրանսիայի ներքին գործերի նախարարն էլ նախորդ տարի Բաքվին մեղադրել էր Նոր Կալեդոնիայում տեղի ունեցած անկարգություններին մասնակցության մեջ։
Թարգմանությունը՝ Էմմա Չոբանյանի
