11.12.2025 | 19:45
Ավելի քիչ փող՝ գիտության զարգացմանը. ինչու է կրճատվում ոլորտի ֆինանսավորումը. ՏԵՍԱՆՅՈւԹ
ՌԴ-ի նկատմամբ տնտեսական ճնշումը մեծացնելու տարբերակներ են պատրաստվել՝ Թրամփին ներկայացնելու համար. Bloomberg
Քաղաքականություն
02.05.2025 | 22:44
ԱՄՆ նախագահ Դոնալդ Թրամփի համար պատրաստվել են Ռուսաստանի նկատմամբ տնտեսական ճնշումը մեծացնելու մի շարք տարբերակներ՝ ստիպելու Մոսկվային դադարեցնել Ուկրաինայում պատերազմը։ Այս մասին հայտնում է Bloomberg-ը՝ վկայակոչելով անանուն աղբյուրներին, գրում է BBC-ի ռուսական ծառայությունը։
Չի հաղորդվում, թե ինչ տարբերակների մասին է խոսքը, սակայն նշվում է, որ որոշումը, ամեն դեպքում, պետք է կայացնի Դոնալդ Թրամփը։
Լրատվամիջոցի գրում է, որ այս առաջարկները պատրաստվել են ՌԴ նախագահ Վլադիմիր Պուտինի կողմից բանակցությունների ձգձգման համատեքստում։
Ո՛չ Պետքատուղարությունը, ո՛չ Ազգային անվտանգության խորհուրդը, ո՛չ էլ հատուկ դեսպան Սթիվ Ուիթքոֆը չեն արձագանքել Bloomberg-ի հարցումներին։
Դոնալդ Թրամփը բազմիցս հայտարարել է՝ կարծում է, որ Վլադիմիր Պուտինը խաղաղություն է ցանկանում, սակայն ապրիլի 24-ի գիշերը Կիևի վրա Ռուսաստանի հարձակումից հետո նա կասկածի տակ դրեց դա և չբացառեց երկրորդական պատժամիջոցների կիրառումը։
ԱՄՆ պետքարտուղար Մարկո Ռուբիոն նշել է, որ պատժամիջոցները դեռևս չեն կիրառվում, քանի որ Վաշինգտոնը հույս ունի պատերազմը դադարեցնել դիվանագիտական միջոցներով։
72 ամերիկացի սենատորներ էլ աջակցում են Ռուսաստանի նկատմամբ «ջախջախիչ» պատժամիջոցներ կիրառելու օրինագծին, եթե Մոսկվան հրաժարվի խաղաղության շուրջ բանակցություններ վարել։
Ռուսաստանի դեմ առաջնային և երկրորդային պատժամիջոցների վերաբերյալ երկկուսակցական այս օրինագիծը, ի թիվս այլ բաների, նախատեսում է 500% մաքսատուրքի սահմանում այն երկրներից ներմուծվող ապրանքների համար, որոնք գնում են ռուսական նավթ, նավթամթերք, բնական գազ կամ ուրան։ Այն նաև ենթադրում է պատժամիջոցներ Ռուսաստանից ուրան գնող ցանկացած երկրի նկատմամբ։
Թարգմանությունը՝ Էմմա Չոբանյանի
