Ավելի քան 70 ամերիկացի սենատորներ աջակցում են ՌԴ-ի դեմ պատժամիջոցների «ջախջախիչ» օրինագծին, եթե Մոսկվան հրաժարվի խաղաղ բանակցություններից

72 ամերիկացի սենատորներ աջակցում են Ռուսաստանի նկատմամբ «ջախջախիչ» պատժամիջոցներ կիրառելու օրինագծին, եթե Մոսկվան հրաժարվի խաղաղության շուրջ բանակցություններ վարել։ Այս մասին հայտարարել է օրինագծի հեղինակներից, հանրապետական ​​Լինդսի Գրեհեմը, գրում է Bloomberg-ը, որին վկայակոչում է Meduza-ն։

Նշվում է, որ այս թիվը բավարար է, որպեսզի օրինագիծն ընդունվի Սենատում։

Գրեհեմն ակնկալում է, որ շաբաթվա վերջում օրինագիծը կունենա առնվազն 67 համահեղինակ, ինչը թույլ կտա չեղարկել ԱՄՆ նախագահ Դոնալդ Թրամփի հնարավոր վետոն։

«Նախաձեռնության նպատակն է օգնել նախագահին»,- ասել է Գրեհեմը, որը համարվում է Թրամփի հիմնական դաշնակիցներից մեկը Սենատում։

Bloomberg-ը նշում է, որ սենատորն օրինագծին աջակցելու հայտարարություններ է արել նույն օրը, երբ ԱՄՆ-ը և Ուկրաինան ստորագրել են օգտակար հանածոների վերաբերյալ համաձայնագիրը։

Ռուսաստանի դեմ առաջնային և երկրորդային պատժամիջոցների վերաբերյալ երկկուսակցական օրինագիծը, ի թիվս այլ բաների, նախատեսում է 500% մաքսատուրքի սահմանում այն երկրներից ներմուծվող ապրանքների համար, որոնք գնում են ռուսական նավթ, նավթամթերք, բնական գազ կամ ուրան։ Այն նաև ենթադրում է պատժամիջոցներ Ռուսաստանից ուրան գնող ցանկացած երկրի նկատմամբ։

Բացի այդ, օրինագիծը ներառում է ԱՄՆ ֆինանսական հաստատությունների համար ներդրումների արգելք Ռուսաստանի կառավարության հետ կապված կազմակերպություններում, իսկ ԱՄՆ քաղաքացիներին կարգելվի գնել ռուսական պետական ​​պարտատոմսեր։

Ռուս-ուկրաինական պատերազմի ավարտի բանակցությունների ֆոնին, որոնք Վաշինգտոնն առանձին-առանձին վարում է Կիևի և Մոսկվայի հետ, ԱՄՆ-ն առաջարկել էր մեղմացնել Ռուսաստանի նկատմամբ սահմանված պատժամիջոցները։

Ենթադրվում է, որ դա կարող է տեղի ունենալ, եթե հակամարտող կողմերը համաձայնեն հրադադարին։ Միաժամանակ, բանակցությունների ընթացքում ԱՄՆ-ը սպառնացել է նոր պատժամիջոցներ կիրառել Ռուսաստանի դեմ, եթե Մոսկվան համաձայնագիր չկնքի։

Թարգմանությունը՝ Էմմա Չոբանյանի