07.12.2025 | 21:40
Վարդենյաց լեռնանցքում ձյուն է տեղում. Դիլիջանի, Սպիտակի ոլորաններում մառախուղ է
Ամառային զորակոչին զինվորներին կառաջարկվի ջրծաղիկի դեմ պատվաստվել
Հասարակություն
02.05.2025 | 14:52
Հայաստանում ջրծաղիկի դեմ պատվաստման գործընթացը հարթ է ընթանում` այսօր լրագրողների հետ հանդիպման ժամանակ ասաց Հիվանդությունների վերահսկման և կանխարգելման ազգային կենտրոնի գլխավոր տնօրեն Ստեփան Աթոյանը։
Նրա խոսքով՝ պատվաստանյութը ներդրվել է 2025 թվականից և նախատեսված է 2023 թվականի նոյեմբերից ծնված 1 տարին լրացած երեխաների, ինչպես նաև նախազորակոչային և զորակոչային տարիքի անձանց համար։
Աթոյանի խոսքով` 2023 թվականից հետո ծնված երեխաների շրջանում պատվաստվածների տոկոսը այս պահին կազմում է 13 տոկոս:
Նախազորակոչային և զորակոչային տարիքի անձանց պատվաստմանն անդրադառնալով՝ Աթոյանը պարզաբանեց.
«Նրանց համար պատվաստումը պարտադիր չէ, սակայն խրախուսվում է: Ամառային զորակոչին զինվորներին կառաջարկվի ջրծաղիկի դեմ պատվաստում»,- նշեց Աթոյանը։
Խոսելով կարմրուկի մասին՝ Աթոյանը ասաց, որ այս պահին աշխարհում կարմրուկի տարածվածության բարձր մակարդակ է դիտվում։
«Հաշվի առնելով, որ սկսվում է արձակուրդային սեզոնը, բարձր է հավանականությունը, որ քաղաքացիները կարող են արտերկրում վարակվել կարմրուկով։
Պետք է զգոն պահել հասարակությանը, սակայն ուզում եմ նշել, որ Հայաստանում կարմրուկի դեմ պատվաստման բարձր մակարդակ ունենք», – ասաց ՀՎԿԱԿ տնօրենը։
Անի Թամրազյան
