21.02.2026 | 20:00
Ինչպես է Հայաստանն առաջին անգամ ստացել UWW-ի մրցաշար անցկացնելու հնարավորություն․ զրույց Վլադիմիր Հովհաննիսյանի հետ
Տնային կալանքի պայմաններում հնարավոր կլինի հեռավար աշխատել. ԱՆ -ն նախագիծ է ներկայացրել
Հասարակություն
23.04.2025 | 11:18
Արադարադատության նախարարի տեղակալ Տիգրան Դադունցն Ազգային ժողովի Աշխատանքի և սոցիալական հարցերի մշտական հանձնաժողովի քննարկմանն է ներկայացրել առաջին ընթերցմամբ ընդունված՝ «Հայաստանի Հանրապետության աշխատանքային օրենսգրքում լրացումներ և փոփոխություն կատարելու մասին» օրենքի նախագիծը․ տեղեկացնում են ՀՀ արդարադատության նախարարությունից։
Նախագծով առաջարկվում է սահմանել, որ երբ դատարանի որոշմամբ աշխատողի, այդ թվում՝ հանրային ծառայության մեջ գտնվող անձի նկատմամբ դատարանը կիրառում է տնային կալանք և տնային կալանքով չեն սահմանվում աշխատանքի կատարման հետ անհամատեղելի սահմանափակումներ, ապա աշխատողը կարող է գործատուի համաձայնությամբ իր բնակության տարածքից կատարել աշխատանքային պարտականությունները, եթե աշխատանքի բնույթը թույլ է տալիս այն կատարել նաև հեռավար եղանակով: Ներկայացվել են նաև տնային կալանքի տակ գտնվելու ժամանակահատվածում աշխատողի աշխատատեղի (պաշտոնի), իսկ աշխատողի լիազորությունները գործատուի և աշխատողի համաձայնությամբ չկասեցվելու դեպքում՝ նաև վարձատրության պահպանմանը վերաբերող կարգավորումները:
Տիգրան Դադունցն իր զեկուցմամբ անդրադարձել Նախագծի երկրորդ ընթերցմանն ընդառաջ Կառավարության գրավոր առաջարկներին: Մասնավորապես, նախաքննական գաղտնիքի պահպանման անհրաժեշտությունից ելնելով՝ առաջարկվում է տնային կալանքը որպես խափանման միջոց կիրառելու մասին դատարանի որոշումը գործատուին ուղարկելու փոխարեն նախատեսել, որ քննիչը տեղեկացնելու է գործատուին որոշման մասին:
Նախագծով առաջարկվում է նաև, որ տնային կալանքը որպես այլընտրանքային խափանման միջոց կիրառելու կամ տնային կալանքի ժամկետը երկարաձգելու մասին որոշման վերաբերյալ քննիչն անհապաղ գրավոր տեղեկացնում է մեղադրյալի աշխատանքի վայրի վարչակազմին՝ նշելով դատարանի որոշմամբ կիրառված սահմանափակումների բնույթն ու ծավալը:
Տիգրան Դադունցի նշմամբ այդպիսով հստակ կսահմանվեն դրույթներ, որոնցից պարզ կդառնա, թե ինչպես է տնային կալանքի տակ գտնվող մեղադրյալի գործատուն իրազեկվելու վերջինիս նկատմամբ տնային կալանք կիրառված լինելու, կիրառված սահմանափակումների բնույթի և ծավալի մասին:
