ՔՊ-ի բերած նախագծի քվեարկությունը տապալվեց

Երևանի ավագանու այսօրվա նիստի օրակարգում ընդգրկված էր «Երևանի աղբահանություն և սանիտարական մաքրում» համայնքային հիմնարկի հաստիքացուցակն ավելացնելու վերաբերյալ նախագիծ։ Ի սկզբանե այն նիստի օրակարգում էր չզեկուցվող ընթացակարգով, սակայն նիստի սկզբում ընդդիմության առաջարկով հարցը դարձավ զեկուցվող։

«Հաշվի առնելով այն հանգամանքը, որ Երևան քաղաքի պատշաճ սանիտարական մաքրումն ապահովելու նպատակով հիմնարկի պարկը համալրվելու է 12 նոր «Կարչեր» տեսակի բազմաֆունկցիոնալ տրանսպորտային միջոցներով, ուստի առաջարկվում է սահմանել թվով 12 բազմաֆունկցիոնալ փոքր տեսակի տրանսպորտային միջոցների վարորդների հաստիքներ` դրույքաչափը սահմանելով 407․000 ՀՀ դրամ»,- Factor.am-ը տեղեկանում է նախագծի հիմնավորումից։

Ընդդիմությունը դեմ էր այս նախագծին, քանի որ, նրանց կարծիքով, պետք է հաստիքացուցակն ավելին լինի, որ վարորդները հանգստանալու համար ժամանակ ունենան։

Ի վերջո, երկար քննարկումներից հետո, նախագիծը քվեարկության դրվեց մեկժամյա ընդմիջումից հետո, սակայն չընդունվեց։

«Քանի որ 31 ձայն է կողմ, նախագիծը չի ընդունվել։ Քվորում չկա, 30 րոպե ընդմիջում»,- ասաց Ավինյանը։

«ՔՊ»-ն ու «Հանրապետություն»-ը միասին ունեն 32 մանդատ և միայն նրանց ձայները բավարար չեն քվորում ապահովելու, որոշումներ ընդունելու համար։ Ստացվում է՝ կա՛մ ՔՊ-ից, կա՛մ «Հանրապետություն»-ից առնվազն մեկ անդամ չի մասնակցել տվյալ քվեարկությանը։

Քվեարկության տապալումից հետևում է նաև, որ նոր գնված լվացման մեքենաները դեռևս չեն շահագործվի՝ վարորդներ չունենալու պատճառով։

Արփի Հակոբյան