Թուրքիան շահագործման է հանձնել առաջին տեղական արտադրության կապի արբանյակը

Թուրքիայի առաջին տեղական արտադրության կապի արբանյակը՝ Türksat 6A-ն, շահագործման է հանձնվել։ Արարողության ժամանակ ունեցած ելույթում երկրի նախագահ Ռեջեփ Թայիփ Էրդողանը ներկայացրել է արբանյակի մշակման առաջընթացը՝ ընդգծելով նման տեխնոլոգիաների արտադրության կարևորությունը՝ առանց արտաքին աղբյուրներից կախվածության։ Նա ասել է, որ անցյալ տարվա հուլիսին ԱՄՆ-ի Քանավերալ հրվանդանում SpaceX-ի կենտրոնից Falcon 9 հրթիռով տիեզերք ուղարկված Türksat 6A-ի բոլոր փորձարկումները հաջողությամբ ավարտվել են։

«Մենք հիմա վայելում ենք մեր արբանյակը շահագործման հանձնելու ուրախությունը։ Հուսով եմ, որ Türksat 6A-ն օգտակար կլինի մեր երկրի և ազգի համար»,- ասել է Էրդողանը մայրաքաղաք Անկարայում կազմակերպված արարողության ժամանակ։

Բացատրելով, որ Türksat-ի կողմից շահագործվող կապի արբանյակների թիվը հասել է վեցի, իսկ տիեզերքում Türksat 6A արբանյակի ժամանման հետ մեկտեղ, որը ծառայություններ կմատուցի առնվազն 15 տարի, Türksat 6A արբանյակի ընդհանուր թիվը տիեզերքում հասել է 10-ի, Էրդողանը նշել է, որ նոր գեոստացիոնար կապի արբանյակը կապահովի արտակարգ կապի ծառայություններ, մասնավորապես, հեռուստատեսային հեռարձակում լայն ծածկույթի գոտում։

«Türksat 6A-ի շնորհիվ, որը մենք մշակել ենք ավելի քան 80% ներքին արտադրության մակարդակով, Թուրքիան դարձել է այն 11 երկրներից մեկը, որոնք կարող են արտադրել սեփական կապի արբանյակներ»,- ասել է նա։

Ըստ Էրդողանի՝ հասել են այն մակարդակին, որ կարող են մրցակցել միջազգային մասշտաբով, հնարավորություն ունեն ստեղծելու ազգային արբանյակային ապրանքանիշը և հիմնելու ազգային տիեզերական ընկերություն։

«Մենք ավելի ենք ամրապնդել մեր արտահանման հնարավորությունները։ Բացի SpaceX-ի հետ համատեղ հետազոտություններ անցկացնելուց՝ տիեզերանավի արձակման գործընթացը կառավարվել է նաև Türksat-ի կողմից»,- նշել է Թուրքիայի նախագահը։

2024 թվականի հուլիսի 9-ին տիեզերք արձակված Türksat 6A-ն ուղեծիր է հասել դեկտեմբերի վերջին և փետրվարին ավարտել իր առաջին փորձնական հեռարձակումը։

Թուրքական առաջին տեղական արբանյակի նախագծմանը և արտադրությանը մասնակցել են տեղի առաջատար ընկերությունները, այդ թվում՝ Թուրքական ավիատիեզերական արդյունաբերությունը (TAI), պաշտպանական և տեխնոլոգիական հսկա «Ասելսանը», ինչպես նաև Թուրքիայի գիտատեխնիկական հետազոտությունների խորհուրդը (TÜBITAK):

Թարգմանությունը Էմմա Չոբանյանի