17.05.2026 | 11:17
«Ուժեղ Հայաստան»-ի աջակիցները խոչընդոտել են ՔՊ-ի նախընտրական քարոզչության բնականոն ընթացքը, 10 անձ ձերբակալվել է. ՔԿ
FT-ն հայտնում է, որ Raiffeisen Bank-ը դադարեցրել է ՌԴ-ից հեռանալու գործընթացը․ բանկը հերքում է
18.04.2025 | 18:49
Ավստրիական Raiffeisen Bank International-ը՝ Ուկրաինայում պատերազմի սկսվելուց հետո Ռուսաստանում բիզնեսը պահպանած ամենամեծ արևմտյան բանկը, դադարեցրել է ռուսական դուստր ձեռնարկությունը վաճառելու փորձերը՝ Ռուսաստանի և Միացյալ Նահանգների միջև հարաբերությունների ջերմացման ֆոնին։ Այս մասին գրել է The Financial Times-ը՝ վկայակոչելով իր աղբյուրներին, փոխանցում է DW-ի ռուսական ծառայությունը։
Նշվում է, որ համապատասխան որոշումը կայացվել է փետրվարին։
«Սա անհրաժեշտ է՝ իրավիճակը գնահատելու և հասկանալու համար՝ արդյո՞ք ԱՄՆ-ի դիրքորոշումը կարող է փոխվել»,- ասել է աղբյուրներից մեկը։
FT-ի հրապարակման օրը, սակայն, Raiffeisen Bank International-ի մամուլի քարտուղար Քրիստոֆ Դանցը ՌԻԱ Նովոստիին հերքել է տեղեկությունը, որ բանկային խումբը որոշել է սառեցնել ռուսական շուկայից դուրս գալու գործընթացը։
«Վաճառքի գործընթացը չի դադարեցվել կամ սառեցվել»,- ասել է նա։
Ուկրաինա ռուսական լայնաշաստաբ ներխուժումից հետո Raiffeisen Bank International-ը, ի տարբերություն շատ ուրիշների, այդպես էլ չլքեց ռուսական շուկան, չնայած մտադրության մասին հայտարարել է 2022 թվականից ի վեր։
2024 թվականի սեպտեմբերի 5-ին Կալինինգրադի մարզի Արբիտրաժային դատարանը որոշում էր կայացրել գրավ դնել արտասահմանյան սեփականատերերով ամենամեծ ռուսական բանկի բաժնետոմսերի վրա։ Ինչպես այն ժամանակ հաղորդել էր «Կոմերսանտ» թերթը՝ դատարանը դատական վարույթի ամբողջ ընթացքում ժամանակավոր արգելք է դրել բանկի բաժնետոմսերի հաշվապահական հաշվառման և իրավունքների փոխանցման վերաբերյալ գրառումներ կատարելու վրա։
Արևմտյան իշխանությունները և կարգավորող մարմինները ճնշում են գործադրում RBI-ի վրա՝ ձգտելով արագացնել բանկային խմբի՝ Ռուսաստանից դուրս գալու գործընթացը։ 2024 թվականին Եվրոպական կենտրոնական բանկը Raiffeisen Bank International-ին և Ռուսաստանում դեռևս գործող այլ եվրոպական բանկերին հանձնարարել էր արագացնեն այդ երկրում իրենց բիզնեսի կրճատման աշխատանքները, եթե չկարողանան այն վաճառել։
Թարգմանությունը՝ Էմմա Չոբանյանի
