08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Tesla-ն կեղծո՞ւմ է մեքենայի օդոմետրի ցուցմունքը․ Մասկի ընկերությանը դատի են տվել
Հասարակություն
18.04.2025 | 13:10
Ամերիկյան Tesla-ն բախվել է հավաքական հայցի հետ, որի համաձայն` ընկերությունն իր էլեկտրական ավտոմեքենաների օդոմետրերը (վազքաչափը) կարգավորում է այնպես, որպեսզի դրանք ավելի արագ հասնեն երաշխիքային սահմանին, որի արդյունքում ընկերությունը կխուսափի վերանորոգման ծախսերից, հայտնում է Reuters-ը:
Բողոք ներկայացրածներից Նյարի Հինթոնը պնդում է, որ Tesla-ի օդոմետրի ընթերցումները հիմնված են էներգիայի օգտագործման, վարորդի վարքագծի և «կանխատեսողական ալգորիթմների» վրա, այլ ոչ թե` իրական անցած ճանապարհի։
Նա նշել է, որ 2022թ. դեկտեմբերին գնել է 2020 թվականի Model Y, որի վրա նշված էր 36,772 մղոն, սակայն, ըստ իր փորձի և մնացած մեքենաների, այն առնվազն 15 տոկոսով արագ է չափում անցած ճանապարհը։ Օրինակ՝ որոշ ժամանակ այն ցույց էր տալիս, թե ինքն օրական անցնում է 72 մղոն, մինչդեռ իրականում նա առավելագույնը անցնում էր 20 մղոն։
Լոս Անջելեսի բնակիչ Հինթոնը նշել է, որ սա հանգեցրել է 50,000 մղոն երաշխիքի վաղաժամ ավարտին, ինչի հետևանքով նա ստիպված է եղել վճարել $10,000 ընթացային (կախոցային) համակարգի վերանորոգման համար, որը ենթադրում էր, որ Tesla-ն պետք է ծածկեր։
«Կապելով երաշխիքային սահմանները և վարձակալության մղոնային սահմանափակումները ուռճացված «օդոմետրի» ընթերցումների հետ՝ Tesla-ն ավելացնում է վերանորոգման եկամուտը, նվազեցնում է երաշխիքային պարտավորությունները և ստիպում է հաճախորդներին ժամանակից շուտ ձեռք բերել երկարաձգված երաշխիքներ»,- ասված է բողոքի մեջ։
Tesla-ն և ընկերության փաստաբանը հինգշաբթի օրը անմիջապես չեն արձագանքել մեկնաբանությունների խնդրանքներին, սակայն նախկինում հերքել են հայցում ներկայացված բոլոր էական պնդումները։
Հինթոնը պահանջում է փոխհատուցում և պատժիչ վնասների վճարում Կալիֆոռնիայում Tesla-ի վարորդների համար, ինչը կարող է ներառել ավելի քան մեկ միլիոն մեքենա, ըստ դատարանի փաստաթղթերի։
Tesla-ն այս ամիս հայցն ուղարկել է Լոս Անջելեսի դաշնային դատարան՝ այն տեղափոխելով այդ քաղաքի նահանգային դատարանից։
Ավտոմեքենա արտադրողը նախկինում ևս բախվել է դատական գործերի՝ կապված մեքենաների ճանապարհային հեռավորության չափի ուռճացման հետ։
2024թ. մարտին Օքլենդի դաշնային դատավորը որոշել էր, որ այդ գործով դիմած վարորդները պետք է իրենց պահանջները ներկայացնեն առանձին, ոչ թե հավաքական հայցով։
